Bartësi i listës për Këshillin Komunal të Tetovës, Albi Qamili, i cili në zgjedhjet e së dielës fitoi rreth 16 mijë vota, ka reaguar me një shkrim ironik ndaj deklaratave të kryetarit të BDI-së, Ali Ahmeti, pas rezultateve zgjedhore.
Në postimin e tij të titulluar “Kur Ali Ahmetin e tradhton gjuha”, Qamili analizon mënyrën se si Ahmeti u përpoq ta paraqesë humbjen e thellë 11 me 1 si fitore, por në fund u zbulua nga vetë fjalët e tij.
“I pyetur nga një gazetar pse nuk jep dorëheqje pas disfatës, Ahmeti u zemërua dhe tha: ‘Pse askush deri tani nuk është dorëhequr kur ka humbur?’
Kaq mjaftoi që maska të binte,” – shkruan Qamili.
Ai e përshkruan këtë moment si “tradhtinë e gjuhës”, kur njeriu pa dashur nxjerr të vërtetën që përpiqet ta fshehë.
Sipas tij, me këtë deklaratë, Ahmeti e pranoi humbjen, por nuk pati guximin të marrë përgjegjësinë.
