Më 25.11.2025, oficerët policorë nga Njësia për Krim Financiar pranë Sektorit për Hetime Kriminalistike në Departamentin për Shtypjen e Krimit të Organizuar dhe Serioz arrestuan pesë persona: N.R. (51) nga Kumanova, ish-drejtor i Ndërmarrjes Publike për Punë Bursiere “Agro Berza” Shkup; R.A. (61) nga Tetova, ish-drejtor i Agjencisë për Rezerva Shtetërore të Mallrave; T.K. (55) nga Shkupi, ish-udhëheqës në të njëjtën agjenci; T.D. (58) nga Kumanova, ish-zëvendësministër i Bujqësisë dhe këshilltar shtetëror në periudhën 2021–2022; si dhe M.P. (68) nga Shkupi, ekspert i angazhuar.
Prokuroria njoftoi se ndaj tyre është dorëzuar kallëzim penal në Prokurorinë Publike të Shkupit për dyshime të bazuara për kryerje të veprës penale “keqpërdorim i pozitës dhe autorizimit zyrtar” sipas nenit 353 të Kodit Penal.
Janë kryer edhe bastisje në pesë lokacione në Shkup, Kumanovë dhe Tetovë.
Si dyshohet se është kryer vepra? Sipas hetimit, N.R., R.A., T.K. dhe T.D., në cilësinë e personave të autorizuar, kanë keqpërdorur pozitën zyrtare duke mos e informuar Qeverinë e RMV-së për gjendjen faktike në “Agro Berza” Shkup, ku ishte konstatuar mungesë e paarsyeshme e 1.500 tonëve grurë merkantil dhe 500 tonëve elb (për periudhën 2019–2021). Në vend të kësaj, ata kanë dërguar të dhëna dhe informacione të pasakta.
Me këtë veprim ata kanë vepruar kundër Ligjit për Rezervat e Mallrave dhe në vitin 2022 kanë përgatitur një procesverbal ku rekomandohej shkrimi (otpis) i mungesës së konstatuar. Dokumenti i është dorëzuar Qeverisë për miratim, ndonëse të njëjtit kanë ditur se mungesat faktike i përkisnin periudhës 2007–2021.
Autoritetet theksojnë se nuk kishte bazë ligjore për përfshirjen e periudhës para vitit 2019, pasi atë vit ishte kryer rinovim i plotë i rezervave, ndërsa nga kontrollimet e rregullta deri në vitin 2019 nuk ishte konstatuar asnjë mungesë.
Roli i ekspertit të angazhuar: I dyshuari M.P., si bashkëpunëtor i jashtëm dhe ekspert i angazhuar përmes Byrosë për Vlerësim, dyshohet se ka vepruar kundër dispozitave të Ligjit për Vlerësim dhe kundër kontratës së nënshkruar. Ai ka përgatitur një ekspertizë me të dhëna të pavërteta, pa marrë parasysh dokumentacionin e plotë të Agjencisë për Rezerva Shtetërore dhe të “Agro Berza”.
Ekspertiza e tij është bashkëngjitur në informacionin dërguar Qeverisë, e cila e ka pranuar atë dhe ka urdhëruar shkrimin e mungesës prej gjithsej 2.000 tonësh drithë. Kjo i ka shkaktuar dëm Buxhetit të RMV-së në vlerë prej 29.112.000 denarësh (473.365 euro), ndërsa sipas çmimeve të vitit 2022, vlera do të arrinte në 48.000.000 denarë (780.487 euro).
