Policia me kamionë dhe forca speciale bllokoi fabrikën
Nën hetim janë kompani me licencë për kanabis mjekësor, ndërsa policia dhe Prokuroria po e zgjerojnë hetimin në Shkup dhe Strumicë.
Aksioni i madh policor, i lidhur me rreth pesë tonë marihuanë të sekuestruara javën e kaluar në Serbi, vazhdon ende. Fokusi i hetimeve është përqendruar në një rrjet kompanish dhe objektesh në Shkup dhe Strumicë, të cilat, sipas dyshimeve, lidhen me eksportin e paligjshëm të drogës nga territori i Maqedonisë së Veriut.
Pasditen e sotme, nën masa të rrepta sigurie, rreth dhjetë automjete transportuese, pesë deri në gjashtë kamionë dhe disa automjete policore hynë në rrethin e ish-fabrikës OHIS në Shkup, ku që nga mbrëmja e kaluar po zhvillohen kontrolle intensive. Qasja në lokacion është plotësisht e ndaluar dhe zona është e mbyllur për publikun.
Sipas informacioneve jozyrtare, objekt i kontrolleve është kompania “Alfafarm”, e vendosur në kompleksin e OHIS-it, e cila lidhet me rastin e marihuanës së sekuestruar në Serbi. Në kuadër të aksionit është arrestuar një nga bashkëpronarët e kompanisë, ndërsa një tjetër, sipas burimeve, ndodhet në arrati. Një nga pronarët ishte ndaluar më herët gjatë aksionit policor në Serbi.
Kompania “Alfafarm” është themeluar në vitin 2023 dhe licencën për kultivimin e kanabisit për qëllime mjekësore e ka marrë në mars të vitit 2024. Nën hetim janë vënë edhe subjekte të tjera juridike që posedojnë leje për prodhimin e kanabisit mjekësor.
Paralelisht me aksionin në Shkup, po kryhen kontrolle edhe në disa lokacione në Strumicë dhe rrethinë. Operacioni po koordinohet nga Ministria e Punëve të Brendshme dhe Prokuroria Themelore Publike për Ndjekjen e Krimit të Organizuar dhe Korrupsionit.
Policia serbe javën e kaluar sekuestroi rreth pesë tonë marihuanë në afërsi të Krushevcit, ndërsa mediat në Serbi raportuan se droga kishte origjinë nga Maqedonia. Pas këtij rasti, Prokuroria Publike e Maqedonisë së Veriut njoftoi se është hapur një lëndë dhe se po ndërmerren veprime për të sqaruar të gjitha faktet dhe rrethanat lidhur me përfshirjen e mundshme të shtetasve dhe kompanive vendore.
Institucionet për momentin nuk japin detaje zyrtare, por përmasat e aksionit dhe përfshirja e disa shërbimeve tregojnë për një goditje serioze dhe të koordinuar ndaj rrjetit të ashtuquajtur të prodhuesve “legalë” të kanabisit.
Pavarësisht heshtjes institucionale, hetimi po zhvillohet në mënyrë diskrete dhe të koordinuar, me synim goditjen e strukturave që dyshohet se prej vitesh kanë keqpërdorur aktivitetin e ligjshëm për eksport të paligjshëm dhe përfitime financiare.
Sipas burimeve, institucionet këtë herë kanë vendosur të shmangin rrjedhjen e informacionit dhe kalkulimet politike, duke synuar që hetimi të përfundojë plotësisht dhe me përgjegjësi të qarta.
