Njësia Speciale e Policisë së Kosovës ka realizuar një aksion të madh në qytetin e Kaçanikut herët në mëngjes, lidhur me hetimet për vrasjen e rreshterit të Policisë, Muhamed Lika i cili u vra javë më parë.
Siç raporton IndeksOnline përmes burimeve gjatë operacionit janë arrestuar pesë persona, transmeton Periskopi.
Në anën tjetër, Gazeta Sinjali duke iu referuar burimeve të veta raportoi se janë arrestuar shtatë persona.
“Disa të arrestuar janë kapur si të dyshuar për ndihmë në kryerjen e veprës penale. Në vendet ku janë kryer kontrollet janë siguruar edhe dëshmi materiale, telefona dhe pamjeve te kamerave”, raportoi Sinjali.
Policia e Kosovës, përmes zëdhënësit Baki Kelani, ka konfirmuar se aksioni është i lidhur me vrasjen e rreshterit Lika.
“Policia e Kosovës, me njësitë e saja relevante, pas hetimeve intensive, sot në orët e hershme të mëngjesit ka filluar një operacion policor, i cili ndërlidhet me rastin e vrasjes së rreshterit Muhamed Lika në Kaçanik. Pas përfundimit të operacionit, do të bëhen publike informacione shtesë”, ka deklaruar Kelani.
