R. M., nëna e njërit prej drejtuesve të Policisë së Serbisë, ka ndërruar jetë më 8 prill në një spital në Beograd, 17 ditë pasi ishte lënduar rëndë në një aksident trafiku të shkaktuar nga një automjet nga kolona e sigurimit të terroristit të kërkuar për sulmin në Banjska, Milan Radoiçiq.
Në veturën që shkaktoi aksidentin ka qenë edhe Aleksandar Filipoviq, ish-polic i Kosovës i cili ka mbajtur pozitën e shefit te operativës për veriun, raportojnë mediat serbe.
KosovaPress mëson se Filipoviq ka pësuar lëndime në këmbë gjatë aksidentit. Filipoviq për një kohë ka shërbyer si pjesë e rrethit të ngushtë të autori të sulmit terrorist në Banjska, Milan Radoiçiq dhe sipas raportimeve të mediave, i njëjti ka mbajtur rol aktiv në veprimtari kriminale në veri të Kosovës.
Emri i Filipoviqit nuk është i panjohur për institucionet e sigurisë në Kosovë. Sipas një raporti të siguruar nga Radio Evropa e Lirë, Aleksandar Filipoviq dhe Nenad Gjuriq, një tjetër ish-zyrtar i lartë në Policinë e Kosovës, kanë vepruar sipas urdhrave të Radoiçiq, për çka më pas kanë marrë medalje nga presidenti i Serbisë Aleksandar Vuçiq.
Kujtojmë, një gjykatë në Serbi më 4 tetor 2023 liroi nga paraburgimi Milan Radoiçiq. Politikani dhe biznesmeni i pasur me lidhje me partinë populiste në pushtet të Serbisë dhe presidentin Aleksandar Vuçiq, ka marrë përgjegjësinë për sulmin e 24 shtatorit në Banjska, ku u vra një polic i Kosovës.
Kosova ka akuzuar Serbinë për akt agresioni, por Beogradi e ka mohuar këtë duke thënë se Radoiçiq dhe grupi i tij prej 30 vetash kanë vepruar vetë.
Radoiçiq kërkohet edhe nga Interpoli, por ai vazhdon të shëtitet nëpër Serbi. Zyrtarët e BE-së dhe SHBA-së kanë kërkuar nga Serbia që të gjithë autorët e sulmit, përfshirë Radoiçiq, të sillen para drejtësisë. /Kosovapress
