VLEN po vazhdon të zgjerohet me ritëm të fuqishëm, duke tërhequr gjithnjë e më shumë të rinj që besojnë në ndryshim, punë dhe ndershmëri. Sot, në një takim të mbajtur me njërin nga liderët e koalicionit dhe kryetarin e Komunës së Çairit, Izet Mexhiti, u formalizuan aderimet e reja nga Tetova.
Lëvizjes VLEN iu bashkuan Ujkan Rahmani, kryetar i FRASH-Tetovë, Ferihane Murtezani, nënkryetare dhe Safet Asani, nënkryetar.
Këta të rinj të angazhuar u shprehën të vendosur për të kontribuar në fuqizimin e rinisë, përfaqësimin e denjë të qytetarëve dhe avancimin e politikave zhvillimore në komunat shqiptare.
Gjatë takimit, Mexhiti i përgëzoi për vendimin e tyre, duke theksuar se VLEN është shtëpia e gjeneratës së re, që beson në politikë të pastër dhe në vizion afatgjatë për zhvillim. Ai nënvizoi se përfshirja e të rinjve në proceset politike është thelbësore për ndërtimin e një shoqërie moderne dhe funksionale. “VLEN po dëshmon se ndryshimi nuk është vetëm slogan, por realitet që po merr formë çdo ditë, me njerëz të rinj, ide të reja dhe energji që frymëzon. Koalicioni do të vazhdojë me hapjen dhe konsolidimin e strukturave në çdo komunë, duke mirëpritur çdo individ që ndan vlerat e demokracisë, përgjegjësisë dhe shërbimit publik”, tha ai.
