Kryetari i Lidhjes Demokratike të Kosovës, Lumir Abdixhiku, ka bërë edhe një reagim në Facebook, lidhur me takimin që mbajti sot me nënkryetarët e partisë.
Abdixhiku ka bërë me dije se do ta dorëzojë dorëheqjen tek Kuvendi i LDK’së, duke e lënë në dorë të delegatëve të vendosin nëse duhet të vazhdojë të qendrojë në pozitën e kryetarit edhe pas rezultatit të zgjedhjeve të 28 dhjetorit, shkruan Reporteri.net.
“Kuvendi, si organi më i lartë i partisë, le të vendosë me dinjitet demokratik jo vetëm për fatin e kryetarit dhe timin personal, por edhe për rrugëtimin e ardhshëm të LDK-së”, ka shkruar Abdixhiku.
Abdixhiku ka inkuruajuar secilin që ka ambicie për të ardhur në krye të LDK’së, që ta kërkojë hapur mbështetjen e anëtarësisë.
“Në këtë kohë, secili që ka ambicie, vullnet dhe aftësi, le ta kërkojë hapur mbështetjen e anëtarësisë sonë. Demokracia nuk është rehati; është guxim për të hyrë në garë, edhe kur është e vështirë”.
Ai ka bërë me dije se fillimisht do të mbledhet Kryesia e LDK’së në një takim zyrtar, e më pas Kuvendi.
“Dhe çfarëdo që të vendosë anëtarësia, unë do ta respektoj me qetësi dhe dinjitet, sepse mbi çdo emër, mbi çdo funksion, qëndron LDK-ja dhe besimi i njerëzve të saj”, ka shkruar Abdixhiku.
Abdixhiku ka thënë se asnjëherë s’ka punuar për veten e tij, më shumë se për LDK’në, duke shtuar se disa beteja i kanë fituar e disa i kanë humbur.
“Në këtë proces, nuk jam as i pagabueshëm, as i përsosur. Kam bërë gjithçka që kam ditur e kam mundur për LDK-në. Disa beteja i fituam, disa i humbëm. Por asnjëherë nuk kam punuar për veten time më shumë sesa për këtë parti”, thuhet në postimin e tij.
Takimi i sotëm i kësaj partie erdhi pas debaklit që shënoi në zgjedhjet e 28 dhjetorit. Krahasuar me ato të 9 shkurtit, LDK ka humbur pesë ulëse në Kuvendin e Kosovës.
