Aleanca për Shqiptarët në përpjekje për t’u konsoliduar, pas një periudhe me kosto të lartë për unitetin e partisë, meqë në rrethana të ndryshime kohore partia u nda në disa grupacione dhe rrjedhimisht struktura u përça në disa linja politike.
Ziadin Sela si themeltar i ideologjisë së ASH-së para dhjetë vitesh, për më 27 dhjetor ka thirrur kuvendin e partisë me rend dite zhvillimet politike në vend dhe strukturimi i organeve partiake. Ndërkohë që Sela diskuton riorganizimin e ASH-së pas daljes nga koalicioni me BDI-në në kuadër të AKI-së, grupacioni tjetër i udhëhequr nga Arben Taravari, është moblilizuar për ta mbajtur gjallë koalicionin me BDI-në në kuadër të AKI-së. Fitorja në Gostivar dhe Vrapçisht, është prioritet numër një i Taravarit, meqë epilogu i kësaj gare, mbase do ta përcaktojë fatin politik të tij. Në sfond, për të konsoliduar strukturat është duke punuar edhe Arben Fetai, grupacioni i tretë që për dallim prej Selës dhe Taravarit, është në Qeveri me Koalicionin VLEN. Fetai, menjëherë pas zgjedhjeve lokale mbajti takime me strukturat e shumicës së komunave.
Siç mëson Alsat, nga mesi i dhjetorit duhet të ketë vendim gjykate, i cili do të përcaktojë nëse vulat duhet t’i ngelen Taravarit apo t’i kthehen Selës. Mes garës disavjeçare për vulat, së fundmi u ngrit dhe një iniciativë nga deputeti Ilir Demiri, për bashkimin e Aleancës për Shqiptarët në një trup. Këtë ai po tenton ta bëjë nga pozita e deputetit të pavarur, pasi kohë më parë u shkëput nga deputetët e tjerë të krahut të Selës.
Megjithatë, siç mëson Alsat, as pala e Selës e as pala e Taravarit nuk kanë një qëndrim zyrtar për këtë iniciativë, ndërsa nuk e presin mirë duke pasur parasysh ndasitë e përshkallëzuara.
Sidomos, duke i pasur parasysh qëndrimet e Selës që akuzon Taravarin se e ka vjedhur partinë dhe kërkesën e tij që Taravari të braktisë ASH-në. Ndërkohë Taravari, për temën e bashkimit ishte shprehur se shtëpia e ASH-së është e hapur dhe të gjithë janë të mirëseardhur.
Si rezultat i përçarjeve, ASH-ja sot në Kuvend ka deputetë edhe në pozitë edhe në opozitë. Si subjekt ka prodhuar 8 deputetë, prej të cilëve 3 të krahut të Selës, 3 të Taravarit 1 deputet i krahut të Arben Fetait dhe Ilir Demiri si deputet i pavarur.
Krisja e parë në ASH ndodhi në momentin kur Arben Taravari, si kryetar i partisë pa pëlqimin e Ziadin Selës i cili atë kohë drejtonte Kuvendin e partisë, vendosi t’i bashkohet VLEN-it dhe të garojë për president të shtetit. Ky vendim i Taravarit e çoi Selën në koalicion me BDI-në. Megjithatë, ASH pësoi dhe një përçarje të dytë kur Taravari vendosi të largohej nga VLEN, ndërsa me këtë vendim Arben Fetai me një strukturë të partisë nuk u pajtua dhe vazhdoi bashkëpunimin me VLEN-in.
Në kohën kur ASH-ja e Selës ka caktuar Kuvend të partisë, këtë strukturë e braktisi njëri ndër më të besuarit e Ziadin Selës ndër vite, ish-ministri i drejtësisë Krenar Llloga i cili njoftoi se tërhiqet nga angazhimi partiak. /Alsat.mk
