Një incident me kërcënime është raportuar në orët e vona të mbrëmjes në Klinikën e Kardiologjisë në kuadër të kompleksit klinik “Nënë Tereza” në Shkup.
Sipas të dhënave nga policia, një infermiere 42-vjeçare nga rajoni i Kumanovës ka denoncuar se rreth orës 23:35 të datës 18 mars, gjatë orarit të punës, është përballur me kërcënime verbale nga një person P.B. nga Shkupi. Mediat raportojnë se personi që ka kërcënuar infermierët ësht Petar Bogoevski, kryetar i partisë “Koncepti Maqedonas”, parti kjo në koalicion qeveritar me VMRO-në.
I dyshuari, sipas raportit të policisë, i cili ndodhej në klinikë ndërsa shoqëronte një grua (nënën) e që kishte ardhur për kontroll mjekësor, ka kërcënuar infermieren si dhe një punonjës tjetër të institucionit shëndetësor.
“Më 19.03.2026, në ora 02:20, në SPB Shkup, M.I. (42) nga rajoni i Kumanovës ka raportuar se më 18.03.2026 rreth orës 23:35, derisa ishte në vendin e punës si infermiere në Klinikën e Kardiologjisë në kompleksin e klinikave ‘Nënë Tereza’, P.B. (47 vjeç) nga Shkupi, i cili ishte në shoqëri të një personi të gjinisë femërore që kishte ardhur për kontroll, ka drejtuar kërcënime ndaj saj dhe ndaj një punonjësi tjetër”.
Nga Ministria e Punëve të Brendshme bëjnë të ditur se janë ndërmarrë masa për zbardhjen e plotë të rastit dhe dokumentimin e tij.
