Kërkesën e BDI-së për mbajtjen e zgjedhjeve të parakohshme bashkë me zgjedhjet lokale në tetor partitë nuk e mirëpritën. Nga VLEN përsëritën se me këtë Integristët e përgatisin terrenin për bojkot të zgjedhjeve lokale për, siç thonë, të shmangin dështimin. Nga ky koalicion thonë se me partinë e Ahmetit nga distanca udhëheq Artan Grubi.
“Kjo është karta e tyre e fundit, për shkak se e dinë se shqiptarët tashmë nuk u besojnë. Vetë Ali Ahmeti pranoi nga Likova: BDI përgatis terren për bojkot të zgjedhjeve lokale! Çfarë do të thotë kjo? Se BDI nuk ka as ide, as program, as njerëz të rinj – vetëm frikë nga shantazhe. A është Artan Grubi autori i skenarit për bojkot të zgjedhjeve lokale”, thotë VLEN.
As për VMRO-DPMNE nuk është e pranueshëm thirrja e këtillë e BDI-së, thonë se ata tashmë nuk janë faktor për të thirrur për zgjedhje të parakohshme ose për bojkot.
“Jemi të fokusuar në zgjedhjet lokale. BDI mund të thërrasë për çfarë të dojë, megjithatë BDI tashmë nuk është asnjë faktor në shtet për të thirrur për bojkot ose diçka tjetër. Kishin mundësi për mbi 20 vjet të bëjnë shumë punë për shtet por fatkeqësisht nuk arritën t’i bëjnë, kështu që, siç thashë ne jemi të fokusuar për realizim të programit tonë si qeveri”, thotë Brane Petrushevski.
BDI të pranojë se është në opozitë dhe të kuptojë se nuk është në gjendje për të vendosur kushte, thonë nga LSDM.
“Qëndrimi i BDI-së për momentin do të thotë se duhet përfundimisht të kuptojnë se janë në opozitë dhe të veprojnë si parti opozitare, të japin qëndrime të tyre për çështje kyçe dhe kur të vijë koha adekuate do të ketë edhe zgjedhje parlamentare. Për momentin ata nuk janë në gjendje për të vendosur kushte dhe të diktojnë ritmin e veprimeve politike në shtet”, tha Sanja Llukarevska.
Këto ditë Ahmeti në fjalimet e tij para qytetarëve thirri për zgjedhje të parakohshme në tetor bashkë me zgjedhjet lokale duke kërkuar që VLEN të largohet nga qeveria. Zgjedhjet lokale pritet të caktohen për gjysmën e parë të tetorit.
