Deputeti i Aleancës për Shqiptarët, Halil Snopçe, nga foltorja e Parlamentit ka reaguar ashpër ndaj kryeministrit Hristijan Mickoski, duke e akuzuar për mungesë argumentesh dhe përdorim të gjuhës kërcënuese në komunikimin publik.
Snopçe theksoi se një kryeministri nuk i shkon për shtat një sjellje arrogante dhe deklarata kontradiktore, duke nënvizuar se kjo qasje dëmton seriozitetin institucional dhe besimin e qytetarëve.
Sipas tij, logjika e Mickoskit është selektive: ai kërkon përgjegjësi nga Arben Taravari dhe Aleanca për Shqiptarët për çdo rast të mundshëm që lidhet me kuadrot e tyre, ndërsa nuk merr asnjë përgjegjësi për aferat korruptive të njerëzve të emëruar nga vetë qeveria e tij.
Snopçe përmendi edhe humbjen e projekteve IPARD 3, në vlerë prej 130 milionë eurosh, duke e lidhur atë me një aferë korruptive dhe duke theksuar se për këtë rast nuk ka pasur asnjë përgjegjësi politike.
Ai përdori edhe një krahasim kritik, duke thënë se në vend kërkohet llogari për raste të vogla, ndërsa për korrupsionin sistematik askush nuk përgjigjet.
Në fjalën e tij, deputeti ngriti dyshime edhe për kalimin e rreth 5 tonëve marihuanë nëpër kufi, duke e cilësuar të pamundur që një sasi e tillë të mos vërehej, ndërsa për një rast të tillë, sipas tij, mungon përgjegjësia institucionale.
Në fund, Snopçe i bëri thirrje kryeministrit që të tregojë më shumë kujdes dhe përgjegjësi në deklaratat publike, duke theksuar se pozita që mban kërkon seriozitet dhe maturi në komunikim.
