Kryeministri i Qeverisë, Hristijan Mickoski, në seancën e sotme parlamentare për pyetje të deputetëve, theksoi se Ligji për përfaqësim të drejtë, pasi ka kaluar të gjitha filtrat dhe ka marrë rekomandim pozitiv nga Komisioni i Venecias, shumë shpejt do të gjendet në Kuvend. Ndërsa lidhur me vërejtjet për përdorimin e gjuhëve, ai theksoi se askush nuk është kundër përdorimit të gjuhëve të tjera, por kujtoi se sipas Kushtetutës gjuhë zyrtare në të gjithë territorin e vendit është gjuha maqedonase dhe shkrimi i saj cirilik informon Tetovasot.
“Ligjin për përfaqësim të drejtë pres së shpejti ta kemi para deputetëve pasi i kaloi të gjitha filtrat, përfshirë edhe atë të Komisionit të Venecias. Me rekomandimet e Komisionit të Venecias, ai do të miratohet në Parlament, do të kalojë në Qeveri dhe shpresoj se do ta mbështesni. Por ky është ligj kushtetues, jo jokushtetues siç ju, përkatësisht koalicioni të cilit i përkisni, i keni mashtruar shqiptarët në Maqedoni për më shumë se 20 vite. Ky është dallimi mes kësaj Qeverie dhe këtij koalicioni dhe atij që ju e mbështesni”, deklaroi Mickoski duke iu përgjigjur pyetjes së deputetit Skender Rexhepi.
Lidhur me përdorimin dhe njohjen e gjuhëve, kryeministri Mickoski theksoi se sipas Kushtetutës gjuha maqedonase është gjuhë zyrtare në të gjithë territorin dhe i tha deputetit Rexhepi se, siç shihet, nuk i duhen kufje për përkthim për ta kuptuar, por nëse i përdor, aty ka përkthim edhe në gjuhën shqipe.
“Asnjë gjuhë nuk më pengon dhe nuk do të më pengojë. Nuk e di pse shqetësoheni, por sipas Kushtetutës, gjuhë zyrtare në të gjithë territorin është gjuha maqedonase dhe shkrimi i saj cirilik. Ka edhe plotësime në nenin tjetër për njësitë e vetëqeverisjes lokale ku mbi 20% e komuniteteve etnike përdorin gjuhën e tyre. Ka komunitet turk, serb, boshnjak, nuk më pengon, përdoreni lirshëm gjuhën shqipe, madje përpiqem edhe ta mësoj. Sa më shumë gjuhë të di, aq më i pasur jam”, theksoi Mickoski.
Kryeministri Mickoski u ndal edhe tek ngjarja në Tetovë, duke theksuar se një sjellje e tillë nga një gazetar ndaj ministres së Arsimit është e papërshtatshme, pavarësisht nëse ndodh në gjuhën maqedonase apo shqipe.
“Absolutisht askush nuk është kundër përdorimit të gjuhës shqipe, nëse doni flisni edhe në anglisht, gjermanisht apo frëngjisht. Askush nuk është kundër, por duhet të dihet se gjuhë zyrtare në këtë shtet është gjuha maqedonase dhe shkrimi cirilik, ndërsa për përdorim ndërkombëtar është gjuha maqedonase dhe shkrimi cirilik, ashtu siç është sipas Kushtetutës”, deklaroi kryeministri Mickoski.
