Ushtria izraelite thotë se ka kapur shumicën e më shumë se 400 raketave balistike që Irani ka qëlluar drejt Izraelit që nga fillimi i luftës SHBA-Izrael.
“Kemi pasur shkallë të shkëlqyera përgjimi — afërsisht 92% shkallë përgjimi të suksesshëm”, tha zëdhënësi i ushtrisë izraelite, nënkolonel Nadav Shoshani, në një konferencë për shtyp të dielën.
Komentet e tij vijnë pasi raketat iraniane goditën qytetet e Aradit dhe Dimonës në Izraelin jugor të shtunën në mbrëmje, duke plagosur mbi 85 persona.
Sulmi i Aradit plagosi të paktën 84 persona dhe disa të tjerë u plagosën gjithashtu në sulmin ndaj Dimonës.
Udhëheqësi suprem i Iranit, Ali Khamenei dhe dhjetëra figura tjera politike dhe ushtarake u vranë qysh në ditën e parë të nisjes së luftës. Presidenti amerikan, Donald Trump paralajmëroi më 4 shkurt se kushdo që synon të ngjitet në pozita të larta, “do të përfundojë i vdekur”.
Udhëheqja klerikale është në krye të Iranit prej Revolucionit Islamik të vitit 1979, në të cilin u rrëzua monarkia e shahut Mohammad Reza Pahlavi, i cili gëzonte mbështetjen e SHBA-së.
Regjimi iranian është kritikuar ndër vite se i ka lyer duart me gjakun e njerëzve të vet, pasi në disa protesta kundërqeveritare, pushteti ka përdorur dorë të hekurt, duke lënë dhjetëra njerëz të vrarë.
