Përzgjedhësi i Shqipërisë në futboll, Sylvinho, ka shpallur të shtunën listën e lojtarëve për ndeshjet e plejofit kualifikues për Botëror.
Shqipëria të enjten në Varshavë luan me Poloninë në gjysmëfinale. Ndërkohë, më 31 mars luan, po në udhëtim, me Ukrainën apo me Suedinë.
Braziliani Sylvinho është bazuar në grupin e konfirmuar të lojtarëve, por ka edhe risi.
Është ftuar mbrojtësi kosovar, Bujar Pllana, që dy javë më parë e fitoi të drejtën të paraqitet me Shqipërinë.
Është ftuar po ashtu Nazmi Gripshi, ish-lojtari i Ballkanit, që nisi furishëm në Rusi te Rubin Kazani.
Është kthyer Anis Mehmeti, që po luan me sukses në kategorinë e dytë angleze. 25-vjeçari, që luan mesfushor ofensiv, për Shqipërinë i ka luajtur tri ndeshje. Të gjitha i zhvilloi në vitin 2023, në mars e qershor.
Pas formës së mirë në Superligën e Turqisë është kthyer edhe Ernest Muçi. Ai luajti së fundi në qershor të vitit të kaluar, kurse nuk u ftua në ndeshjet e vjeshtës.
Në listë është edhe Armando Broja, por jo Mirlind Daku, që ende është i lënduar. Stavro Pilo, i lindur në Greqi, është emër i ri po ashtu, ndërsa rastin e fitoi edhe Klinsman Cake.
