Është vërejtur një interes i jashtëzakonshëm për konkursin e fundit për punësim në institucionet e Bashkimit Evropian. European Personnel Selection Office (EPSO) ka njoftuar se për 1.500 pozita administrative të nivelit AD-5 janë paraqitur rreth 170.000 kandidatë nga e gjithë Evropa, shkruan Bulevar.mk
Arsyeja kryesore e këtij interesimi të lartë janë pagat fillestare konkurruese, që variojnë nga 6.000 deri në 7.000 euro në muaj, si dhe siguria në vendin e punës dhe përfitimet e shumta që sjell statusi i një punonjësi në institucionet e BE-së.
Ky konkurs konsiderohet veçanërisht tërheqës pasi një thirrje e tillë për pozita administrative nuk është hapur që nga viti 2019. Për këtë arsye, shumë kandidatë që kanë punuar me kontrata të përkohshme e kanë parë këtë si një mundësi të rrallë për punësim të përhershëm. Mijëra prej tyre janë përgatitur prej vitesh për aplikime të tilla.
Interesi është aq i madh sa EPSO po përballet me sfida logjistike, ndaj testimi për këtë numër të madh kandidatësh do të zhvillohet tërësisht online, duke e çuar sistemin në kufijtë e kapaciteteve të tij.
Megjithatë, edhe për ata që kalojnë fazat fillestare, punësimi nuk është i garantuar. Konkurrenca për secilën nga 1.500 vendet e punës pritet të jetë shumë e fortë. Numri më i madh i aplikimeve ka ardhur nga Italia, me mbi 79.000 kandidatë, duke e renditur këtë vend si lider për interesin për punë në institucionet e Bashkimit Evropian.
