Besimtarët muslimanë sot në Maqedoninë e Veriut dhe mbarë botën festojnë Fitër Bajramin, një ndër festat më të mëdha, e cila vijon menjëherë pas mbarimit të agjërimit të Muajit të Ramazanit.
Në ora 5:04 besimtarët në Shkup e kanë falur namazin e sabahut, ndërkaq në ora 06:19 namazin e Fitër Bajramit.
Manifestimi qendror u mbajt në Xhaminë e “Mustafa Pashës” në Shkup, dhe u transmetua drejtpërdrejtë në TVM2.
Pas faljes së namazi i Fitër Bajramit, muslimanët kanë uruar njëri tjetrin me mesazhe paqeje, mirësie respekti.
Kreu i Bashkësisë Fetare Islame, reis Shaqir efendi Fetahu në porosinë e Fitër Bajramit theksoi se sot përjetohet një nga gëzimet më të mëdha të vitit.
“Gjatë gjithë muajit të Ramazanit dëshmuam urtësinë, maturinë, paqen dhe solidaritetin tonë të paluhatshëm. Në këtë festë të madhe shpirtërore jemi të lumtur që triumfuam mbi destruktiven, materializmin, egoizmin dhe xhelozinë. Me këtë i dërguam botës mesazhin se vlerat morale janë qëllimi më i lartë i aktivitetit njerëzor. Me ndjenjën e urisë dhe etjes ne i bëmë thirrje botës për më shumë kujdes ndaj njeriut. Paqja që kultivuam gjatë Ramazanit dëshmoi se njerëzimi duhet të jetë i përkushtuar ndaj respektimit të vlerave njerëzore, duke shmangur vrasjet, luftërat, masakrat dhe gjenocidet”, tha Fetahu.
Ai theksoi se Fitër Bajrami është gjithashtu një ditë pajtimi dhe afrimi, se është dita kur duhet të hapim zemrat , të falim njëri-tjetrin dhe të forcojmë lidhjet familjare dhe shoqërore.
Urime kanë dërguar edhe liderët politikë dhe funksionarët në Maqedoninë e Veriut, rajonit e mbarë botës.
Ramazani është muaji i nëntë i kalendarit Islam. Muaji zgjatë 29 ose 30 ditë bazuar në vëzhgimet pamore të hënës së re dhe sipas llogarive të shumta të hartuara në hadithe.
Ramazani është muaji i agjërimit, që do të thotë shmangia e ushqimit dhe lëngjeve, fjalëve dhe sjelljeve të këqija dhe gjërave të tjera të ndaluara në Islam. Agjërimi është një nga pesë shtyllat e Islamit dhe zgjatë nga agimi deri në perëndimin e diellit.
Në fund të ramazanit vjen Fitër Bajrami.
Auktuale.mk ua uron të gjithë besimtarëve muslimanë festën e Fitër Bajramit, duke uruar për shëndet, mirëqenie, dhe solidaritet.
