Kryeprokurori i ri i shtetit Nenad Saveski dha betimin solemn duke premtuar se do të punojë në korniza të Kushtetutës, ligjeve dhe dokumenteve ndërkombëtare. Saveski kishte pritur mbështetje pak më të madhe nga deputetët në Kuvend por siç tha, çdo fjalë dhe çdo vërejtje e tyre është e vlefshme. Tha se nuk do të ketë prioritet për asnjë lëndë dhe të gjitha do të trajtohen në mënyrë të barabartë.
“Garantoj transparencën dhe llogaridhënien për punën e çdo prokurori publik në çdo lëndë. Plani im për punë është modernizimi i Prokurorisë Publike me digjitalizim për menaxhim të lëndëve dhe ndarjen e tyre për punë te prokurorët e përmes së cilës do të ndiqeshte puna e çdo prokurori. Nuk do të ketë prioritet të lëndëve pasi për mua çdo lëndë është e barabartë. Për të luftuar me sukses korrupsionin na nevojitet mbështetje financiare”, deklaroi Nenad Saveski, Kryeprokuror.
