Ministri i Mjedisit Jetësor dhe Planifikimit Hapësinor, Muamet Hoxha, së bashku me ministrin e Ekonomisë dhe Punës, Besar Durmishi, sot prezantoi Metodologjinë e re për thjeshtimin e procedurave administrative.
Kjo iniciativë, pjesë e Agjendës së Reformës 2024–2027, synon krijimin e një sistemi më efikas që do t’u ndihmojë drejtpërdrejt ndërmarrjeve të vogla dhe të mesme.
Në kuadër të këtij procesi, janë identifikuar gjithsej 100 procedura administrative, të përzgjedhura sipas shpeshtësisë së përdorimit dhe rëndësisë së tyre për bizneset, ndërsa 31 procedura që zbatohen nga Ministria e Mjedisit janë pjesë e kësaj liste prioritare për thjeshtim.
“Procedurat e ndërlikuara, afatet e gjata dhe dokumentacioni i gjerë paraqesin një pengesë reale për rritjen dhe konkurrueshmërinë e kompanive. Prandaj po vendosim një qasje sistematike për identifikimin dhe thjeshtimin e procedurave më të ngarkuara”, theksoi ministri Hoxha.
Ai shtoi se përmes koordinimit më të mirë ndërmjet institucioneve, administrata do të transformohet në një shërbim të vërtetë që ofron shërbime më të shpejta dhe kushte më të mira për punë.
Ministri i Ekonomisë dhe Punës, Besar Durmishi, theksoi se gjatë periudhës së kaluar Qeveria ka punuar me përkushtim në agjendën reformuese dhe në përmbushjen e hapave të paraparë.
“Ne si Ministri e Ekonomisë dhe Punës, por edhe si raportues për hapat që kanë të bëjnë me uljen e ekonomisë joformale, në koordinim me institucionet e tjera, përfshirë edhe Ministrinë e Mjedisit Jetësor dhe Planifikimit Hapësinor, po e përmirësojmë klimën e biznesit për ndërmarrjet e vogla dhe të mesme”, theksoi ministri Durmishi.
Plani i reformës është i qartë: nga procedurat e identifikuara, do të përzgjidhen 50 prioritare për ndërhyrje të menjëhershme. Rezultati përfundimtar që pritet nga qytetarët dhe bizneset është ulja e burokracisë për të paktën 50 për qind.
Kjo në praktikë nënkupton dyfish më pak hapa, më pak dokumente të nevojshme dhe kohë shumë më të shkurtër për përfundimin e detyrimeve administrative, duke lehtësuar ndjeshëm funksionimin e përditshëm të ndërmarrjeve të vogla dhe të mesme.
