Ngjarja më e madhe letrare në vend edhe këtë vit do ta shndërrojë Shkupin në një qendër për dashamirët e letërsisë. Panairi i Librit këtë vit do të mbahet nën moton “Hap një dritare drejt botëve të reja”, duke theksuar fuqinë e librave për të na çuar në aventura që nuk i kemi imagjinuar kurrë.
Në periudhën nga 23 deri më 29 prill, arena “Boris Trajkovski” do të jetë mikpritëse për lexuesit dhe adhuruesit e librave, por edhe për autorë, punonjës kulturorë, përkthyes dhe botues nga vendi dhe jashtë tij.
Hapja e një libri të ri do të thotë edhe hapja e një dritareje drejt një bote të re. Një botë që ne vetë e kemi zgjedhur dhe mezi presim ta njohim. Çdo faqe sjell një aventurë të re, na prezanton me personazhe të rinj që ndonjëherë bëhen shembull për ne, e ndonjëherë miq, përmes përvojave të të cilëve kuptojmë ndjenja që na ndihmojnë të gjejmë kuptim në jetët tona.
Pikërisht kjo magji letrare është në fokus të Panairit të Librit këtë vit dhe theksohet mrekullisht përmes sloganit “Hap një dritare drejt botëve të reja”. Kjo fjali jo vetëm që përshkruan bukurinë që përmbajnë librat, por edhe e fton lexuesin të zhytet dhe të notojë në historitë e tyre.
Nga shtëpia botuese GNOSA deklaruan se pas dhjetë vitesh funksionimi, katërdhjetë titujve të botuar, katërmbëdhjetë numrave të revistës “Mejdani” dhe shumë energjie e shprese për të ardhmen, si dhe dashurisë së pafund për të Vërtetën, megjithatë mezi presin panairin, ku do të jenë të pranishëm edhe këtë vit.
Organizatori njoftoi se Panairi i Librit 2026 do t’u ofrojë vizitorëve një program të pasur me bestsellerë të njohur, botime nga autorë të dashur vendorë dhe të huaj, si dhe promovime të veprave të reja që do ta pasurojnë javën më të rëndësishme në kalendarin e lexuesit vendas.
Të pranishmit në panair do të kenë mundësi të ndjekin prezantime dhe punëtori me autorë të njohur nga vendi dhe jashtë tij, ndërsa botuesit do të prezantojnë tituj ekskluzivë dhe botime të papara më parë.
Panairi i Librit është një nga ngjarjet më të rëndësishme kulturore që mbahen në Shkup dhe në një vend bashkon publikun lexues nga të gjitha qytetet e vendit, por edhe nga jashtë. Një trend i dukshëm në vitet e fundit është rikthimi i gjeneratës së re në panair, e cila po bëhet gjithnjë e më e interesuar për botën letrare dhe rregullisht shënon shifra të larta të vizitueshmërisë.
Kështu pritet të jetë edhe këtë vit, në periudhën nga 23 deri më 29 prill, kur arena “Boris Trajkovski” do të jetë e hapur për dashamirët e fjalës së shkruar të të gjitha moshave. Edhe këtë vit panairi i librit organizohet me mbështetjen e Ministrisë së Kulturës dhe Turizmit.
