Sulmuesi i Kosovës, Fisnik Asllani, ka sqaruar në detaje arsyet pse vendosi të mos përfaqësojë Gjermaninë, pavarësisht se ishte pjesë e strukturave të saj dhe shumë pranë ekipit U21.
Në një intervistë për Bild, Asllani thekson se vendimi i tij nuk kishte të bënte me aspektin sportiv, por me ndjenjat dhe lidhjen e fortë me vendin e origjinës. “Ishte një vendim i zemrës… e ndjeva që është e duhura të luaj për Kosovën”, shprehet ai, duke e cilësuar këtë si një nga zgjedhjet më të rëndësishme të karrierës së tij.
Ai zbulon se momenti vendimtar erdhi pak para se të bashkohej me ekipin U21 të Gjermanisë, kur filloi të reflektojë më seriozisht për të ardhmen e tij ndërkombëtare. “E diskutova gjatë me familjen time dhe në fund vendosëm bashkë. Lidhja me Kosovën ka qenë gjithmonë shumë e fortë”, tregon Asllani.
Futbollisti shton se kujtimet nga fëmijëria kanë ndikuar shumë në këtë zgjedhje, pasi çdo verë e kalonte në Kosovë dhe ndihej i lidhur emocionalisht me vendin e prindërve të tij. “Kam kaluar shumë kohë atje, kam familjen atje dhe gjithmonë jam ndjerë pjesë e atij vendi”, thotë ai.
Megjithatë, Asllani nuk harron të falënderojë Gjermaninë për zhvillimin e tij si futbollist, duke pranuar se akademitë dhe përvoja atje kanë pasur ndikim të madh në karrierën e tij. “Jam shumë mirënjohës për gjithçka që kam mësuar në Gjermani, por në fund vendimi ishte për atë që ndjeja brenda vetes”, përfundon ai.
