Industria amerikane e mbrojtjes po përballet me presion për të rritur prodhimin për të përmbushur nevojat që po krijon konflikti me Iranin, duke nxjerrë në pah tensionet midis kompanive dhe administratës Trump.
Të premten e kaluar Presidenti Donald Trump priti në Shtëpinë e Bardhë drejtuesit e shtatë kompanive kryesore të mbrojtjes, Lockheed Martin, Raytheon (RTX), BAE Systems, Boeing, Honeywell Aerospace dhe Northrop Grumman- për të diskutuar prodhimin dhe afatet e tij, ndërsa shqetësimet mbi rezervat e raketave me rreze të gjatë dhe interceptorëve ajrorë po rriten, së bashku me paqartësinë që rrethon aftësinë e industrisë për të rritur prodhimin në rast të një konflikti të zgjatur.
Ka pasur raportime se negociatat midis Pentagonit dhe kontraktorëve më të mëdhenj amerikanë të mbrojtjes për kapacitete të reja prodhimi nuk po përparojnë aq shpejt sa do të dëshironte Shtëpia e Bardhë, për shkak të tensioneve të vazhdueshme. Trump i ka kritikuar vazhdimisht kontraktorët, duke i akuzuar se kanë pasur prioritet e shpërndarjes së dividentëve për aksionerët dhe pagat e drejtuesve në vend që të investojnë në kapacitetet prodhuese. Ai madje ka kërcënuar të përjashtojë disa kompani nga kontratat qeveritare nëse nuk rrisin prodhimin dhe investimet në fabrika.
Sektori po përballet gjithashtu me sfida strukturore: hapja e objekteve të reja prodhuese ose sigurimi i lëndëve të para mund të zgjasë vite, ndërsa vonesat në miratimin e buxheteve nga qeveria amerikanë po frenojnë rritjen e kapaciteteve. Analistët paralajmërojnë se kjo vonesë mund të ketë pasoja gjeopolitike serioze.
Sondazhet aktualisht sugjerojnë se Demokratët kanë një shans të mirë për të rimarrë kontrollin e Kongresit të SHBA‑së në zgjedhjet afatmesme të nëntorit, e kjo, sipas ekspertëve, mund të vendosë një kufi të qartë për shpenzimet e mbrojtjes”.
