Rrjeti i ujësjellësit në Tetovë nuk do të privatizohet. Kështu ka deklaruar kreu i Tetovës, Bilall Kasami, por tha se shihet mundësia e partneritetit publik-privat për instalimin e orëmatësve të ujit, ndërsa e njëjta kompani do të bëjë edhe faturimin dhe inkasimin e harxhimeve të ujit.
“Në bazë të ligjit uji nuk mund të privatizohet, e kam thënë dhe do ta përsëris. Që të mund ky problem një herë e përgjithmonë të zgjidhet, në bazë të studimit del që në këtë fazë duhet të kyçet edhe partner privat që do të ofronte teknologjinë dhe diturinë për sa i përket asaj që është pika më e dobët për gjithë sistemin me furnizim me ujë. Ajo ka të bëjë me matjen, faturimin dhe inkasimin e harxhimit të ujit të pijshëm në Tetovë. Po të kyçet partneri privat do të lehtësohet zgjidhja e problemit të ujit të pijshëm.”, – deklaroi kryetari i Komunës së Tetovës, Bilall Kasami.
Nga AKI dhe “Më Mirë për Tetovën” thanë se komuna bën zgjidhje, por çdo herë në kurriz të qytetarëve.
“Ata pranuan vetë se nuk kanë mundësi për të menaxhuar ndërmarrjen dhe kërkojnë ndihmë nga partneri privat, që është përsëri zgjedhja që gjendet në kuadër të komunës në kurriz të qytetarëve. Nuk shitet uji, e kuptojmë, është në rregull të gjithë të paguajmë, por zgjedhja që ofron komuna është gjithmonë në kurriz të qytetarëve. Ashtu siç ndodhi me mbledhjen e mbeturinave, kuptohet gjendet zgjidhja, por qytetarët paguajnë faturat.”, – theksoi Elmedina Abdullahi nga Organizata “Më mirë për Tetovën”.
“Më së shumti e shohim se ky projekt shkon drejt rrugës së privatizimit. Ne si këshilltarë komunalë, në momentin që kjo pikë do të vijë në rend dite, do të ketë diskutime dhe pyetje shtesë. Nuk do të votojmë me sy të mbyllur dhe kjo situatë i ngjason EVN-MEPSO, njëra bën shpërndarjen e tjetra inkasimin.”, – u shpreh Berat Murati nga AKI.
Këto komente u bënë sot gjatë debatit publik me temë “Transformimi digjital i ujëmatësve në Tetovë”, në të cilin u prezantua studimi i fizibilitetit për digjitalizimin e ujëmatësve. Nga ky studim shihet se zgjedhja e vetme është që në menaxhim të ndërmarrjes të inkuadrohet edhe privati, që sipas tyre do të zgjidhte problemin me ujin në Tetovë. Sipas të dhënave të paraqitura në debat, brenda një viti Tetova nga burimet e Sharrit furnizohet me rreth 10 milionë metra kub ujë, ndërsa faturon rreth 3 milionë metra kub, prej të cilave më pak se 25% e qytetarëve paguajnë.
