Bujqësia e Maqedonisë nuk është vetëm një degë ekonomike. Ajo është pjesë e identitetit tonë, traditës sonë dhe të ardhmes sonë. Pas çdo produkti vendas qëndron puna, përkushtimi, dijet dhe angazhimi i mijëra bujqve që çdo ditë punojnë për të siguruar ushqim cilësor për qytetarët tanë.
Pikërisht për këtë arsye, sot nga këtu shpall se Ministria e Bujqësisë, Pylltarisë dhe Ekonomisë së Ujërave së bashku me Qeverinë po fillojnë fushatën “Zëri që e dëgjojmë – më e mira e Maqedonisë”.
Qëllimi ynë është që në periudhën e ardhshme dy ekipe të mëdha të vizitojnë më shumë se 30 komuna në Republikën e Maqedonisë, ndërsa 6 ekipe më të vogla do të vizitojnë mbi 120 vendbanime.
Këto takime do të mbahen çdo të mërkurë dhe të shtunë nga ekipet e mëdha, ndërsa të premteve do të organizohen takime të drejtpërdrejta në vendbanime nga ekipet më të vogla.
Ekipet më të vogla do të udhëhiqen nga:
Daniela Irotova, drejtoreshë e Agjencisë për Mbështetje Financiare në Bujqësi dhe Zhvillim Rural (AMFBZHR),
Filip Filipovski, drejtor i SH.A. “Ekonomia e Ujërave”,
Vase Anakiev, drejtor i Inspektoratit Shtetëror për Bujqësi,
Oliver Milanov, drejtor i Agjencisë për Ushqim dhe Veterinari,
Zdravko Trajanov, drejtor i NP “Pyjet Nacionale”, si dhe unë, në cilësinë e ministrit, do të udhëheq një nga ekipet.
Në këto ekipe do të marrin pjesë edhe drejtorë të tjerë të sektorit, si: Drejtoria për Ekonomi të Ujërave, Drejtoria për Punë Hidrometeorologjike, Agjencia për Nxitjen dhe Zhvillimin e Bujqësisë, Laboratori Shtetëror Fitosanitar dhe Drejtoria Fitosanitare. Natyrisht, në këto vizita në terren do të përfshihen edhe strukturat lokale të Ministrisë dhe të institucioneve përkatëse.
Në këto takime do të diskutohet për sfidat reale me të cilat përballen bujqit e vendit, do të dëgjohen propozimet dhe idetë e tyre, por gjithashtu do të prezantohen politikat dhe masat për mbështetjen e bujqësisë vendase, prodhimit dhe gjithë asaj që është realizuar gjatë gati dy viteve të mandatit të kësaj Qeverie.
Përmes kësaj tregojmë dhe dëshmojmë se bujqit nuk janë vetëm prodhues, por edhe shtytës të zhvillimit rural, ruajtës të traditës dhe faktor kyç për stabilitetin e tregut vendas të ushqimit. Prandaj mendimi, përvoja dhe propozimet e tyre kanë rëndësi të madhe në krijimin e politikave të ardhshme në sektorin bujqësor.
Vetëm të bashkuar, me dialog të hapur dhe bashkëpunim të ndërsjellë, mund të krijojmë zgjidhje që do të sjellin zhvillim të qëndrueshëm, stabilitet dhe vlerë më të madhe për prodhimin e vendit.
Besoj se më e mira nga Maqedonia vjen pikërisht nga arat e vendit tonë dhe nga duart e palodhura të bujqve tanë të ndershëm dhe punëtorë. Prandaj kjo fushatë u kushtohet pikërisht atyre, njerëzve që ushqejnë popullin dhe ruajnë traditën.
Të nderuar bujq,
Ju ftoj të gjithëve të përfshiheni dhe të bëheni pjesë e kësaj fushate të përbashkët “Zëri që e dëgjojmë – më e mira e Maqedonisë”, që së bashku të krijojmë kushte më të mira dhe një të ardhme më të sigurt për bujqësinë e Maqedonisë.
