Në garën e Chinese Grand Prix në Shanghai, Kimi Antonelli arriti fitoren e parë në karrierën e tij në Formula One. Pas pole position-it të parë një ditë më herët, italiani 19-vjeçar e shndërroi startin nga vendi i parë në fitore, pa u rrezikuar gjatë garës. Ai bëhet kështu fituesi i dytë më i ri në historinë e F1, pas Max Verstappen që fitoi në moshën 18-vjeçare në 2016.
Pas tij përfundoi George Russell në vendin e dytë, ndërsa Lewis Hamilton mori vendin e tretë pas një dueli të fortë me shokun e skuadrës Charles Leclerc, i cili u rendit i katërti. Dy pilotët e Ferrari zhvilluan një betejë intensive, por të pastër, pa përplasje.
Në mes të garës pati incident mes Esteban Ocon dhe Franco Colapinto në kthesën e parë, çka solli edhe hyrjen e Safety Car. Strategjia me goma të forta nuk funksionoi për Ocon, ndërsa Colapinto arriti të marrë pikën e parë duke përfunduar i dhjeti.
Garë shumë të mirë bëri edhe Pierre Gasly që u rendit i gjashti, ndërsa Oliver Bearman përfundoi në vendin e pestë pasi mbajti pas për një kohë të gjatë Max Verstappen.
Verstappen pati një ditë të vështirë: start i dobët dhe më pas një problem mekanik në xhiron 47 që e detyroi të tërhiqej nga gara. Ndërkohë Liam Lawson fitoi pikët e para me vendin e shtatë, ndërsa Carlos Sainz Jr. përfundoi i nënti.
Disa pilotë nuk arritën të startonin për shkak të problemeve teknike, përfshirë Lando Norris, Oscar Piastri, Alex Albon dhe Gabriel Bortoleto. Skuadra Audi, së bashku me Cadillac dhe Aston Martin, u larguan nga gara në Kinë pa asnjë pikë.
