Presidenti i Shtetet e Bashkuara të Amerikës, Donald Trump, njoftoi se forcat amerikane kanë kryer një nga sulmet ajrore më të fuqishme në historinë e vendit në Lindjen e Mesme, duke goditur objektiva ushtarake në Ishullin Kharg të Iranit. Duke folur para gazetarëve dhe përmes një postimi në rrjetin social Truth Social, Trump deklaroi se operacioni kishte në shënjestër instalacione strategjike në ishull, i cili konsiderohet një qendër kyçe për eksportin e naftës së Iranit.
Menjëherë pas njoftimit, presidenti amerikan publikoi në Truth Social një video që sipas tij tregon sulmet ajrore amerikane në ishullin Kharg. Në pamje shihen shpërthime të mëdha dhe re të dendura tymi, ndërsa raportimet flasin për goditje ndaj objekteve të aeroportit dhe pistës së uljes.
Para se të hipte në avionin presidencial Air Force One, Trump deklaroi se fuqia ushtarake e Iranit është dobësuar ndjeshëm. “Fuqia e tyre detare është zhdukur. Forca e tyre ajrore është zhdukur. Shumica e trupave të tyre janë zhdukur… pothuajse gjithçka është zhdukur dhe do ta shihni”, tha ai. Trump theksoi gjithashtu se strategjia amerikane në rajon mbetet vendimtare dhe paralajmëroi se SHBA do të mbrojë lundrimin e sigurt në Ngushticën e Hormuzit. Sipas tij, shoqërimi i cisternave të naftës që kalojnë në këtë rrugë të rëndësishme detare pritet të fillojë “shumë shpejt”.
Presidenti amerikan shtoi se situata në Iran “po shkon shumë mirë” për SHBA-në dhe se vendi i tij ndodhet në një pozicion për të “dominuar” zhvillimet në rajon. Ndërkohë, tensionet në Lindjen e Mesme mbeten të larta dhe reagimet ndërkombëtare pritet të pasojnë në orët në vijim.
Footage has now been published by President Donald J. Trump showing today’s strikes against Iranian military targets on Kharg Island in the Northern Persian Gulf, which acts as a port hub for the export of up to 90% of oil products leaving Iran. In the footage, strikes can be… pic.twitter.com/WH3iWw74sE
— OSINTdefender (@sentdefender) March 14, 2026
