Opozita kërkon që Komisioni Rregullator për Energjetikë të ulë menjëherë çmimet e karburanteve, pasi çmimi i naftës bruto në bursat botërore, pas rritjes mbi 100 dollarë, dje u ul rreth 85 dollarë dhe tani është afërsisht 90 dollarë për barrel.
Nga BDI propozuan pesë masa, duke përfshirë rishikimin dhe korrigjimin e çmimeve të vendosura dje nga Komisioni Rregullator dhe lëshimin e rezervave shtetërore të naftës për 62 ditë, me çmim maksimal prej 71 denarësh për litër.
“Kryeministria duhet menjëherë të shqyrtojë mundësinë për uljen e taksave për derivatet e naftës, përfshirë akcizën dhe detyrimet e tjera, për të stabilizuar çmimet dhe mbrojtur standardin e qytetarëve. Njëkohësisht, inspektoratet duhet të verifikojnë sasinë e karburantit që kanë pasur stacionet para orës 00:00 të hënës dhe për ato sasi të vendoset ngrirja e çmimeve, sepse janë importuar me çmime më të ulëta”, tha Albana Mustafa nga BDI.
BDI kërkon gjithashtu sanksione për operatorët që nuk furnizuan qytetarët gjatë fundjavës dhe në ditët e fundit.
Edhe LSDM reagoi, duke pyetur pse çmimet e karburanteve janë rritur kur çmimet në bursat botërore kanë rënë.
“Pse janë rritur çmimet kur bursat globale tregojnë rënie? Me këtë rritje, qytetarët paguajnë mbi 3 milionë euro më shumë në javë. Kush përfiton nga kjo dhe ku shkojnë këto para? A i rriti Qeveria qëllimisht çmimet, edhe pse çmimi i barrelit ra dje?”, u shpreh Bogdanka Kuzeska nga LSDM.
Sipas LSDM-së, Qeveria përfiton në kurriz të qytetarëve duke ndryshuar mënyrën e vendosjes së çmimeve: tani Rregullatori vendos çmimet vetëm një herë në javë, të hënën, në vend që t’i përcaktojë çdo ditë – thonë nga atje.
