VLEN-i një, kjo ishte porosia e koalicionit pas takimit me kryeministrin Albin Kurti në Prishtinë të cilës i parapriu vizitës në Prekaz me rastin e Epopesë së UÇK-së. Vizita në Kosovë, kishte karakter unifikues të koalicionit në vigjilje të paralajmërimeve për shkrirje në një parti, derisa disa rryma brenda koalicionit mbetën jashtë. Në fotografinë familjare në Prekaz, u panë përfaqësues nga të gjitha partitë përbërëse, përfshirë edhe deputetin Ilir Demiri, një prurje e re që së bashku me Mimoza Musën dhe Azir Aliun morën udhëheqjen e ASH-së brenda qeverisë. Mungoi Fatmir Limani, ministri i padëgjueshëm, që së fundi u përplas me Bilall Kasami, mes akuzave se punon më shumë për Mickoskin se VLEN-in.
Delegacioni i VLEN-it, por në format më të ngushtë u takua me Kurtin, që siç mëson Alsat, temë e bisedës ka qenë aktualiteti politik, pas shtrimit dhe dakordimit të qasjes së re të VLEN-it, si parti.
Të pranishëm ishin Izet Mexhiti dhe Bilall Kasami si liderë të ardhshëm të partisë, nënkryetarët Ilir Demiri dhe Bekim Qoku, sekretari i përgjithshëm Bekim Sali, por edhe deputetja Mimoza Muza, për të cilën aktualisht nuk është e njohur se çfarë pozitë do të mbajë pas themelimit të partisë. Nga ana tjetër, Albin Kurti ishte i shoqëruar nga këshilltari i tij Elvis Hoxha.
Siç mëson Alsat, procesi i shkrirjen është përmbyllur. Parimisht të gjitha partitë kanë rënë gjetur dakordësi parimore për lidershipin e VLEN-it dhe për mënyrën e vendimmarrjes.
Alternativa ka kërkuar edhe pak kohe deri në njoftimin e të gjithë anëtarësisë, ndërkohë që kërkon më shumë garanci për 20 përqindshin e saj brenda partisë, edhe pse brenda VLEN-it siç mëson Alsat vendimet e mëdha do të merren me konsensus ose me votim prej dy të tretave të Kuvendit. /Alsat.mk
