“Nuk ndihemi të sigurta si gra në shoqërinë maqedonase”, “Nuk do të zhdukemi”, “Asnjë më shumë” dhe “Përshëndetje, sa buqeta vlejnë jetët tuaja” – ishin mesazhet që dërguan qindra qytetarë, prej të cilëve shumica gra, të cilët sot u mblodhën në parkun “Gruaja-Luftëtare” në Shkup në protestën e 8 Marsit kundër dhunës ndaj grave dhe femicidit.
Qytetarët e filluan marshin protestues me një minutë heshtje në nder të të gjitha grave që e kanë humbur jetën, e që sistemi nuk arriti t’i mbrojë.
“Kam tri porosi: për institucionet, kryeministrin dhe ministrin e Punëve të Brendshme. Si nuk ju vjen turp të dilni në foltore pas një numri rekord vrasjesh të grave, të cilave u ka paraprirë dhunë e denoncuar, për të cilën nuk është vepruar siç duhet, dhe të na porosisni që të denoncojmë, ndërkohë që nuk i trajtoni denoncimet”, u shpreh një aktiviste.
Organizatorët porositën se lufta për barazi, siguri dhe dinjitet të grave duhet të vazhdojë, ndërsa institucionet kompetente duhet t’i përkushtohen më seriozisht zgjidhjes së këtyre problemeve.
“Qëndroj sot para jush si një nënë që e dëgjoi të qarën e vogëlushes Katja dhe nuk qëndroi pa reaguar për të parë dhunë para syve të saj. Qëndroj edhe si një fëmijë që shihte dhunë në shtëpinë e vet dhe nuk kishte zë të kundërshtonte. Dy fëmijë, në lot dhe në dhimbje, u panë në atë moment, dhe unë u thashë se gjithçka do të bëhet mirë. E ngushëllova dhe i dhashë një grimcë shprese se në këtë botë ekziston drejtësia. Por, 45 ditë më vonë, ajo shpresë nuk ishte e mjaftueshme”, tha një aktiviste.
Ata theksuan se urimet festive dhe gjestet simbolike nuk janë të mjaftueshme, nëse paralelisht nuk punohet për çrrënjosjen e dhunës në bazë gjinore, pabarazisë ekonomike dhe diskriminimit.
“Gruaja asnjëherë nuk ka qenë dhe as tani nuk është e sigurt. Ne, si gra, ekzistojmë në margjinat e shoqërisë, si dhe në margjinat e historisë, nën rrezik të vazhdueshëm që të fshihemi, të harrohemi, të vritemi – si faktikisht ashtu edhe figurativisht. Dështimin institucional dhe shmangien e përgjegjësisë gruaja i paguan me shëndetin e saj, jetën dhe ekzistencën e saj dinjitoze”, deklaroi një aktiviste.
Ata i bënë thirrje institucioneve, por edhe gjithë shoqërisë, që të përfshihen në mënyrë aktive në krijimin e një mjedisi më të drejtë dhe më human.
“Çfarë duhet të ndryshojmë është pyetja. Përgjigjja e shkurtër është: gjithçka, gjithçka. Tingëllon e frikshme, duket e pamundur, madje edhe pa shpresë. Si do ta ndryshojmë gjithçka dhe pse pikërisht gjithçka? Sigurisht, diçka nuk shkon në këtë sistem dhe mjafton të ndëshkohet korrupsioni, të ndryshohen disa ligje dhe të vijnë njerëz të rinj në ato pozita udhëheqëse, dhe atëherë gjërat më në fund do të shkojnë në drejtimin e duhur”, u shpreh një aktiviste.
Marshi mbahet në nder të luftës për të drejtat e grave dhe traditës historike të 8 Marsit, i cili simbolizon solidaritetin dhe rezistencën në betejën për barazi dhe jetë dinjitoze. /Alsat.mk
