Zëvendësdrejtori i Drejtorisë së Doganave Mustafa Dauti realizoi sot një vizitë pune në Pikën Kufitare Jazhincë si dhe në Terminalin Doganor në Tetovë, me qëllim që nga afër të njihet me funksionimin e proceseve të përditshme dhe me aktivitetet që zhvillohen në këto pika të rëndësishme doganore.
Gjatë vizitës, ai pati mundësinë të takojë dhe të bisedojë drejtpërdrejt me zyrtarët doganorë, të cilët çdo ditë janë të angazhuar në menaxhimin e fluksit të qytetarëve dhe në sigurimin e funksionimit efikas të procedurave doganore.
Në këtë kontekst, u theksua rëndësia që ka Pika Kufitare Jazhincë si një nga nyjet kryesore të komunikimit ndërkufitar, e cila kërkon përkushtim të vazhdueshëm institucional për të garantuar shërbim cilësor dhe funksionim të rregullt për të gjithë qytetarët që kalojnë përmes saj.
Dauti vlerësoi lart angazhimin dhe profesionalizmin e zyrtarëve doganorë, duke theksuar se prania në terren dhe komunikimi i drejtpërdrejtë me stafin është thelbësor për përmirësimin e vazhdueshëm të punës dhe për forcimin e sistemit doganor.
Në përfundim të vizitës, Dauti shprehu mirënjohje për punën dhe përkushtimin e stafit doganor, duke theksuar se kontributi i tyre i përditshëm është shumë i rëndësishëm për ruajtjen e standardeve profesionale dhe për ofrimin e shërbimeve cilësore ndaj qytetarëve.
