Premtuam dhe po punojmë në krijimin e kushteve, sjelljen e rregulloreve dhe sigurimin e mjedisit sistemor që do t’u mundësojë grave pavarësi më të madhe ekonomike. Para së gjithash, po punojmë në përmirësimin e arsimit dhe qasjes në arsim. Arsimi u mundëson grave të zhvillojnë mendim kritik, aftësi për marrjen e vendimeve dhe shkathtësi për zgjidhjen e problemeve, gjë që është thelbësore për pozitat udhëheqëse, tha sekretarja shtetërore në Ministrinë e Arsimit dhe Shkencës, Elena Ivanovska, në shënimin e Ditës Ndërkombëtare të Gruas 2026, të organizuar nga Ministria e Politikës Sociale, Demografisë dhe Rinisë, Universiteti “Shën Kirili dhe Metodi” në Shkup dhe Kombet e Bashkuara në vend, nën temën globale “Të drejta. Drejtësi. Veprim për të gjitha gratë dhe vajzat”.
Ivanovska, në panel-diskutimin për gratë lidere të fuqishme dhe gratë që marrin vendime, theksoi se gratë e arsimuara kanë më shumë gjasa të arrijnë pavarësi ekonomike përmes angazhimit në punë, udhëheqjes së sipërmarrjeve dhe kontributit në zhvillimin shoqëror. Arsimi ndikon gjithashtu në ndryshimin e qëndrimeve shoqërore dhe ndihmon në thyerjen e stereotipeve që kufizojnë pjesëmarrjen e grave në aktivitete udhëheqëse dhe ekonomike.
Kur flasim për lidershipin, duhet të flasim edhe për barrierat. Paragjykimet, stereotipet, mosbesimi – këto janë pengesa që shumë gra i kanë larguar nga rruga e lidershipit. Personalisht, jam realizuar si bashkëshorte dhe si nënë, paralelisht me avancimin tim arsimor, e më vonë edhe me angazhimin politik. Është mit që gruaja duhet të zgjedhë mes familjes dhe karrierës. Lidershipi do të thotë të gjesh forcën për t’i harmonizuar rolet. Ky është një sfidë, por secila prej nesh është dëshmi se gratë kanë kapacitet për të udhëhequr”, theksoi Ivanovska.
Ajo theksoi se me çdo vendim që merret nga udhëheqësia e MASH-it , pjesë e së cilës është edhe ajo vetë, merret përgjegjësi për të rinjtë dhe për arsimimin e tyre. Ajo sqaroi se reformat që po zbatohen aktualisht janë të orientuara drejt përvetësimit më shumë njohuri dhe me cilësi më të mire por edhe drejt formimit të personaliteteve që mendojnë në mënyrë kritike, me empati dhe me përgjegjësi ndaj komunitetit.
“Ky është themeli i lidershipit, të dish ta përdorësh dijen për jetë më të mirë të njerëzve, të bësh ndryshime që e ngrejnë shoqërinë shkallë më lart”, theksoi Ivanovska.
Për Ligjin e ri për Arsimin e Lartë, ajo tha se po miratohet për të siguruar studime më cilësore për të rinjtë, programe bashkëkohore dhe mundësi të barabarta për të gjithë.
“Është detyra jonë të krijojmë kushte që ju të rinjtë, vajzat dhe gratë e reja t’i realizoni potencialet dhe nevojat tuaja. Si shtet, na nevojiten edhe më shumë gra që të inkurajohen dhe ta zhvillojnë potencialin e tyre për lidership”, theksoi sekretarja shtetërore.
Në diskutim morën pjesë gjithashtu ministrja e Energjetikës, Minierave dhe Burimeve Minerale, Sanja Bozhinovska, deputetja Zhaklina Peshevska dhe ambasadorja e Japonisë, Secuko Kavahara. Ivanovska theksoi se të gjithë ato janë dëshmi se lidershipi nuk është privilegj vetëm i burrave, as i disa të përzgjedhurve dhe se asnjë grua nuk lind me fuqinë për të marrë vendime, por ajo ndërtohet si lidere.
Porosia ime për vajzat dhe gratë e reja është se lidershipi mësohet. Dijet dhe aftësitë që ju duhen zhvillohen hap pas hapi. Për t’u bërë lidere, nuk duhet të prisni që dikush t’ju lejojë. Duhet të merrni përgjegjësi. Dhe ta mbani mend – nëse niseni, do të arrini!”
Ivanovska: Gratë kanë kapacitet për të udhëhequr, po e përmirësojmë arsimin që sa më shumë vajza të bëhen lidere të mira
