Cristiano Ronaldo ka blerë 25% të aksioneve të klubit spanjoll që ka një pronar nga Arabia Saudite, përmes degës së tij CR7.
“Ka qenë një ambicie e imja prej kohësh të kontribuoj në futboll, përtej fushës. UD Almeria është një klub spanjoll me themele të forta dhe potencial të qartë për rritje” – tha Ronaldo në deklaratë.
Almeria ka qenë nën kontrollin e pronarëve nga Arabia Saudite për më shumë se gjashtë vjet. Mohamed Al-Khereiji u bë pronari dhe presidenti i ri i klubit në verën e vitit 2025 kur e bleu atë nga Turki Al Alsheikh.
“Jemi shumë të kënaqur që Cristiano ka zgjedhur klubin tonë për të investuar. Ai i njeh shumë mirë ligat spanjolle dhe e kupton potencialin e asaj që po ndërtojmë këtu si në aspektin e ekipit ashtu edhe të akademisë” – tha Al-Khereiji në deklaratë.
Almeria aktualisht është në vendin e tretë në ligën e dytë të Spanjës. Herën e fundit ishte në ligën e parë në sezonin 2023-24.
