Siç është njoftuar, sapo marrëveshjet të finalizohen dhe të jenë në përputhje të plotë me rregullat e roaming të BE-së, nuk do të ketë tarifa shtesë për thirrjet, mesazhet SMS dhe përdorimin e të dhënave celulare gjatë udhëtimit në vendet e Bashkimit Evropian.
Kjo do të thotë lidhshmëri me çmime vendase jo vetëm për qytetarët dhe bizneset nga Ballkani Perëndimor që udhëtojnë në BE, por edhe për udhëtarët e BE-së që vijnë në vendet e rajonit.
Duke miratuar propozimin për mandatet negociuese, Komisioni po kërkon miratimin e Këshillit të BE-së për të hapur negociatat me vendet e Ballkanit Perëndimor. Pas vendimit të Këshillit, Komisioni do të negociojë marrëveshje dypalëshe me secilin vend individualisht.
Propozimi synon të ndërtojë mbi marrëveshjet ekzistuese vullnetare midis operatorëve celularë në BE dhe Ballkanin Perëndimor, të cilat tashmë parashikojnë tarifa më të ulëta të roamingut. Qytetarët nga Ballkani Perëndimor tashmë gëzojnë tarifa të reduktuara kur udhëtojnë brenda rajonit, bazuar në marrëveshjen rajonale të roamingut.
Komisionerja Europiane për Zgjerimin, Marta Cos, deklaroi se tarifat e roaming-ut janë problem në rajon dhe se “faturat e papritura gjatë udhëtimit janë diçka që nuk pranohet më në BE”, duke theksuar se qëllimi është që ky regjim të shtrihet në Ballkanin Perëndimor.
