Drejtoria Vendore e Policisë Elbasan ka njoftuar zyrtarisht bllokimin e plotë të qarkullimit në aksin rrugor Librazhd–Qafë Thanë (Pogradec) deri në një njoftim të dytë. Ky vendim vjen si masë për të siguruar rendin dhe sigurinë në këtë segment të rëndësishëm rrugor.
Sipas njoftimit zyrtar, lëvizja e të gjitha mjeteve, përfshirë mjetet e tonazhit të rëndë, autobusët dhe mjetet e vogla, është ndaluar. Pikat kufitare janë të detyruara të orientojnë drejtuesit e mjeteve dhe t’u bëjnë të ditur se nuk mund të vazhdojnë lëvizjen në këtë aks.
Për mjetet e vogla është përcaktuar një rrugë alternative: aksi Maliq–Lozhan–Moglicë–Gramsh, që lidh Librazhdin me Tiranën dhe anasjelltas. Ndërkohë, do të lejohen vetëm kalimi i ambulancave, shërbimeve zjarrfikëse dhe mjeteve të Policisë.
Shërbimet e Policisë janë në terren për të monitoruar situatën dhe për të orientuar drejtuesit e mjeteve, duke bërë apel qytetarëve për mirëkuptim dhe për të respektuar udhëzimet e dhëna nga autoritetet përkatëse.
