Komuna e Çairit ka intensifikuar zbatimin e projekteve të parapara me Masterplanin zhvillimor, ndërsa gjatë kësaj jave, kryetari i komunës, Izet Mexhiti, së bashku me ekipin profesional që ka hartuar dokumentin strategjik, realizoi një vizitë në terren për të inspektuar nga afër ecurinë e investimeve në disa prej lagjeve të komunës.
Gjatë vizitës u prezantuan ndërhyrjet e realizuara deri më tani, si dhe u diskutuan fazat e ardhshme të zhvillimit urban. Ndër projektet kryesore që tashmë kanë hyrë në fazë të avancuar të zbatimit janë punimet në Rrugën “Ferid Murat” dhe “Mit’hat Frashëri”, ku përmirësimet në infrastrukturën rrugore, qarkullim dhe standard urban janë të dukshme dhe po ndikojnë drejtpërdrejt në rritjen e sigurisë dhe lehtësimin e lëvizjes së qytetarëve.
Paralelisht, po vijon ndërtimi i pishinës së re komunale, një investim strategjik në funksion të zhvillimit të sportit, rekreacionit dhe aktiviteteve rinore, i cili pritet të krijojë hapësira moderne dhe të standardizuara për komunitetin.
Një tjetër segment me rëndësi të veçantë është fillimi i zgjerimit të bulevardit “Cvetan Dimov”, projekt që synon rritjen e kapaciteteve të trafikut, përmirësimin e sigurisë rrugore dhe krijimin e një aksi më funksional për qarkullimin urban. Në të njëjtën kohë, vendosja e kontenjerëve nëntokësorë për menaxhimin e mbeturinave përfaqëson një hap konkret drejt modernizimit të shërbimeve publike dhe përmirësimit të higjienës urbane.
Vizita në terren shërbeu për të vlerësuar dinamikën e realizimit të projekteve, për të analizuar sfidat eventuale dhe për të koordinuar hapat e ardhshëm, me qëllim garantimin e zbatimit cilësor dhe brenda afateve të parapara.
Me këtë rast, kryetari Izet Mexhiti theksoi se Masterplani i Çairit po materializohet përmes investimeve konkrete dhe të qëndrueshme.
“Çairi po hyn në një fazë të re zhvillimi urban. Çdo projekt që po realizojmë është pjesë e një vizioni afatgjatë për një komunë më funksionale, më të organizuar dhe me standarde bashkëkohore. Angazhimi ynë mbetet maksimal që investimet të përfundojnë me cilësi të lartë dhe në shërbim të drejtpërdrejtë të qytetarëve,” deklaroi Mexhiti.
