Konfederata e Punëdhënësve është për rritjen e pagës minimale, megjithatë ata kërkojnë që për shumën nga 600 deri në 6.000 denarë të lirohen nga kontributet sociale, ku edhe punëdhënësit edhe qeveria mund të ndihmojnë në drejtim të rritjes së pagave të punëtorëve dhe forcimit të standardit të jetesës. Mile Boshkov nga kjo konfederatë në intërvistë për Radion Evropa e Lirë tha se, ata duhet t’i përfaqësojmë interesat e të gjithë punëdhënësve, veçanërisht të ushtruesve të pavarur të veprimtarisë, sipërmarrësve të rinj dhe zejtarëve, të cilët kanë vështirësi për të siguruar të ardhura të qëndrueshme, në mënyrë që të mund të përballojnë rritjen e detyrimeve në lidhje me pagat dhe kontributet.
Mile Boshkov, Konfederata e Punëdhënësve
“Ka ndodhur në vendin tonë, por edhe në vende të tjera, që qeveria të marrë pjesë kur bëhet fjalë për standardin e qytetarëve. Prandaj ne ofruam një zgjidhje që jo subvencionimi, por lirimi nga kontributet sociale mund të jetë çelësi për rritjen – përkatësisht ulje të kostove të punëdhënësve në bazë të kontributeve sociale, por njëkohësisht edhe rritje të pagës neto për punëtorët. Këtu qeveria mund të marrë pjesë, megjithatë me gjasë është e vetëdijshme se në muajin mars bëhet harmonizimi, prandaj edhe e shtyn përfshirjen në këtë aktivitet”.
Në lidhje me qëndrimin e odave ekonomike të cilat, e problematizojnë “produktivitetin e ulët” të punëtorëve për ta arsyetuar pagën minimale, Boshkov tha se, bizneset e përdorin këtë si preteks për të mos rritur pagën, ndërsa në fakt, sipas tij, se vetëm një numër shumë i vogël kompanish e dinë çfarë është produktiviteti.
Mile Boshkov, Konfederata e Punëdhënësve
“Jo vetëm në sektorin privat por edhe në atë publik, punëdhënësit vërtet nuk dinë si ta matin produktivitetin, sepse nuk kanë investuar as në mjete, as në dije, as në teknologji – absolutisht në asgjë. Me përgjegjësi deklaroj se produktiviteti përdoret si një frazë boshe, si një justifikim për të mos e rritur pagën minimale. Dhe me përgjegjësi të plotë, duke marrë mbi vete gjithë rrezikun, them se punëdhënësit nuk e dinë, por duhet të mësojnë se çfarë do të thotë produktivitet dhe matje e produktivitetit”.
Kujtojmë se, Lidhja e Sindikatave vazhdimisht kërkon rritjen e pagës minimale në 600 euro. Për këtë, javën e kaluar u organizuan edhe protesta, me ç’rast u bllokua hyrja e Kuvendit dhe e Odës Ekonomike. Ndërkaq, Qeveria thotë se për rritjen e pagës minimale, duhet të ketë pajtim edhe nga punëdhënësit./SHENJA/
