Evropa, e cila është varur nga Shtetet e Bashkuara për mbrojtjen e saj për dekada të tëra, tani duhet të përparojë dhe “të marrë përsipër përgjegjësitë e saj ”, tha të shtunën Presidentja e Komisionit Evropian Ursula von der Leyen.
“Siguria e Evropës nuk është konsideruar gjithmonë përgjegjësia jonë kryesore. Por kjo ka ndryshuar rrënjësisht”, theksoi ajo në Konferencën e Sigurisë në Mynih, duke argumentuar se një Evropë e fortë “do të thotë një aleancë më e fortë transatlantike”.
Për ta arritur këtë, Evropa duhet të “çlirohet nga të gjitha tabutë”, vuri në dukje ajo, duke përmendur konkretisht përdorimin e “klauzolës së mbrojtjes së ndërsjellë”, një angazhim kolektiv nga shtetet anëtare të BE-së për t’u mbrojtur në rast të një sulmi.
“Mendoj se është koha për të aktivizuar këtë klauzolë, e cila është e sanksionuar në traktatet evropiane. Ne duhet të zhvillojmë një shtyllë evropiane të aftësive strategjike: në sektorin e hapësirës, informacionin dhe aftësitë e goditjeve të thella”, shtoi ajo.
Evropa ka nisur tashmë një përpjekje historike për riarmatim për të siguruar mbrojtje të besueshme deri në vitin 2030, pas kërcënimeve nga Shtetet e Bashkuara për të ulur investimet në NATO.
