Në seancën e 149-të, Qeveria e Maqedonisë së Veriut vendosi që të krijohen bazë ligjore për nënshkrimin e marrëveshjes ndërmjet Ministrisë së Shëndetësisë dhe Qytetit të Shkupit në lidhje me parkingun te Klinika “Nënë Tereza” në Shkup, transmeton Portalb.mk.
“Qeveria po ashtu mori vendim për zgjidhjen përfundimtare të çështjes së parkimit në Kampusin Klinik “Nënë Tereza”, me të cilin mbyllen çështjet administrative që për dekada pengonin rregullimin e parkimit në Kampusin Klinik “Nënë Tereza”. Me këtë vendim krijohet bazë ligjore për nënshkrimin e marrëveshjes ndërmjet Ministrisë së Shëndetësisë dhe Qytetit të Shkupit”, raporton Qeveria e RMV-së.
Qeveria pret ndërtimin e një parkingu modern dhe funksional, duke përfshirë edhe garazhe në kate. Ata theksojnë se paraprakisht, Ministria për tre muaj ka kryer regjistrimin e parcelës në Kadastër dhe ka përgatitur elaboratin përkatës.
Kryetari i Qytetit të Shkupit, Orce Gjorgjievski, më 26 janar paralajmëroi fillimin e procesit për ndërtimin e dy garazheve të montuara shumëkatëshe brenda Qendrës Klinike në Shkup. Ai paralajmëroi 500 vende të reja parkimi.
Në dhjetor në vitit të kaluar, ministri i Shëndetësisë Azir Aliu tha se në qendrën klinike diku deri në maj do të kemi parking krejtësisht të ri me infrastrukturë “smart” dhe garazh në kate.
Në parkingun e Qendrës Klinike “Nënë Tereza” mbretëron kaosi i përditshëm. Hapësira është shumë e vogël për të akomoduar makinat e mijëra pacientëve dhe punonjësve që qarkullojnë në këtë zonë çdo ditë. Nervozizmi fillon që para hyrjes në klinika – në rrugë ka radhë automjetesh që presin për të hyrë në njërën nga klinikat, ndërsa brenda, pasi të keni marrë biletë, është e vështirë të gjeni një vend parkimi. Pasi pacientët marrin shërbim mjekësor, ata detyrohen të presin përsëri në radhë dhe të paguajnë në kabinën “Parkingu i Qytetit” ose në makinë, dhe pastaj të presin përsëri dhe mezi të dalin nga zona Klinike me automjetet e tyre.
Parkimi në këtë pjesë të Shkupit është një problem kronik që asnjë ministër i shëndetësisë nuk ka gjetur kurrë një mënyrë për ta zgjidhur, megjithëse shumë prej tyre, kur u emëruan në detyrë, gjëja e parë që premtuan ishte pikërisht kjo – zgjidhja e problemit të parkimit.
Në 10 vitet e fundit, kanë ndryshuar 9 ministra të shëndetësisë. Imer Selmani, Bujar Osmani, Nikolla Todorov, Arben Taravari (2 mandate), Venko Filipçe, Bekim Sali, Fatmir Mexhiti, Ilir Demiri dhe Azir Aliu (aktual). Shumë prej tyre premtuan zgjidhjen e kaosit.
Ish-ministri i Shëndetësisë Fatmir Mexhiti, kur mori detyrën, tha në një takim informues me gazetarët se së pari do të merrej me kaosin me parkingun në Qendrën Klinike, por kjo nuk ndodhi.
Më 7 mars të vitit të kaluar, kur Arben Taravari ishte ministër i Shëndetësisë, kompania “Gjoka Construction” nga Shqipëria ishte e vetmja që aplikoi në thirrjen e shpallur për menaxhimin e parkingut në Qendrën Klinike. Taravari tha se nuk e dinte se çfarë portofoli kishte kjo kompani. Kjo kompani duhej të ndërtonte garazhe shumëkatëshe brenda “gjashtë muajsh deri në një vit”, por kjo nuk ndodhi sepse qeveria nuk e miratoi planin që kjo kompani ta ndërtonte atë.
