Garuesja e karatesë nga Tetova, Erdona Ziberi, ka regjistruar një paraqitje shumë të suksesshme në Kampionatin Evropian për Kadetë, Juniorë dhe U21, të zhvilluar nga 6 deri më 8 shkurt në Limassol të Qipros, duke u renditur në vendin e pestë në Evropë.
Me luftëra të forta dhe përballje ndaj kundërshtareve elitare nga mbarë kontinenti, Erdona dëshmoi nivel të lartë sportiv, përgatitje serioze dhe karakter garues, duke qenë konkurruese deri në fazat vendimtare të turneut.
Në ndeshjen për medaljen e bronztë, karatistja tetovare u përball me Amali Hakova nga Çekia, ku pas një dueli të fortë dhe të balancuar, nuk arriti të sigurojë podiumin, mirëpo gjithsesi duke e mbyllur kampionatin në një pozitë të shkëlqyer mes më të mirave të Evropës.
Erdona Ziberi është pjesë e Klubit të Karatesë “Fati” nga Tetova, nën udhëheqjen e trajnerit Arlind Huseini.
