Studentët me bursa shtetërore që studiojnë në 100 universitetet më prestigjioze në botë do të kenë përparësi në punësim në fakultetet vendore. Ligji i ri për Arsimin e Lartë parashikon gjithashtu më shumë fonde për universitetet që plotësojnë kritere më të larta, forcim të kritereve për titujt akademikë, rizgjedhje çdo 7 vjet dhe mundësinë e mbajtjes së përhershme të titullit profesor. Këto risi u prezantuan nga ministrja e Arsimit dhe Shkencës, Vesna Janevska, me mbështetjen, siç tha, të mbi 60 profesorëve, institucioneve dhe përfaqësuesve të studentëve.
“Po ndaj një lajm të mirë për studentët, që me bursë shtetërore studiojnë në 100 universitetet më të mira në botë, ose studiojnë në Maqedoni dhe janë fitues të Unazës Inxhinierike apo janë shpallur studentët më të mirë të universitetit – ata do të kenë përparësi në punësimin në universitetet shtetërore, si kuadër mësimor-shkencor. Kjo është një nga risitë e Ligjit për Arsimin e Lartë.”, – deklaroi ministrja e Arsimit dhe Shkencës, Vesna Janevska.
Ajo nënvizoi se është vendosur një model i ri financimi për arsimin e lartë, që shpërblen universitetet më të suksesshme me më shumë fonde. Ky model synon të nxisë konkurrencën dhe të rrisë cilësinë.
“Po i forcojmë kriteret për avancim në tituj akademikë në fakultete. Çdo person që do të aplikojë për zgjedhje në titull docent, profesor i asociuar ose profesor i rregullt nga tani, në varësi të titullit, do të ketë obligim që deri në zgjedhje të përgatisë dhe publikojë nga 6 deri në 7 punime shkencore, prej të cilave 3 deri në 4 duhet të jenë të botuara në revista me faktor ndikimi nga bazat Web of Science ose Scopus. Kjo është e rëndësishme, sepse statistikat botërore tregojnë se, që një universitet të renditet ndër 1.000 universitetet më të mira në listën e rangimit të Shangait, duhet të publikojë të paktën 1.200 punime në vit në revista me faktor ndikimi. Universitetet tona publikojnë mes 300 dhe 500 punime në vit dhe këtë duhet ta ndryshojmë.”, – theksoi ministrja e Arsimit dhe Shkencës, Vesna Janevska.
Ajo bëri të ditur se profesorët që janë aktualisht në proces zgjedhjeje do të kenë lehtësime procedurale, ndërsa ligji i ri lejon mbajtjen e përhershme të të njëjtit titull akademik, nëse plotësohen kushtet në çdo rizgjedhje. Në të ardhmen, profesorët e rregullt do t’i nënshtrohen rizgjedhjes çdo 7 vjet, ndërsa ata të zgjedhur më herët nuk do të preken nga ky ndryshim. Mandati i rektorëve zgjatet në 4 vjet dhe ndryshon modeli i zgjedhjes së tyre.
Ligjet e reja për arsimin e lartë dhe cilësinë në arsimin e lartë janë publikuar në sistemin ENER dhe janë të hapura për komente nga publiku, ndërsa ligji për shkencën dhe veprimtarinë shkencore-kërkimore është ende në përgatitje.
