Policia sonte po përfundon sekuestrimin e rreth dhjetë tonëve marihuanë në Shkup, të lidhura me pesë tonët e konfiskuar më herët në Serbi, të cilat ishin të magazinuara në ambientet e kompanisë së përfshirë në rastin e kontrabandës ilegale, mëson “Skopje1” nga burime të përfshira në hetim. Paralelisht me këtë sekuestrim, sipas të njëjtave burime, po zhvillohet edhe një aksion i dytë në lokacione jashtë Shkupit, ku po konfiskohen edhe 18 tonë të tjera marihuanë. Sipas informacioneve jozyrtare, sekuestrimi i dytë po kryhet në rajonin e Strumicës.
Aksioni, i cili po zgjat gjatë gjithë ditës, po realizohet nga Ministria e Punëve të Brendshme, nën udhëzimet e Prokurorisë për Ndjekjen e Krimit të Organizuar dhe Korrupsionit. Me këtë operacion konfiskohet një sasi totale prej rreth 27 tonësh marihuanë, që sipas informacioneve të disponueshme paraqet konfiskimin më të madh të drogës në Maqedoni për të cilin është informuar ndonjëherë publiku.
Aksioni vjen pas ngjarjeve të katër ditëve më parë, kur në Serbi u gjetën dhe u konfiskuan pesë tonë marihuanë, për të cilat autoritetet serbe njoftuan se ishin kontrabanduar nga Maqedonia dhe ishin të destinuara për tregun serb. Institucionet serbe bënë të ditur se droga ishte e magazinuar në një depo të lidhur me një familje në një fshat të rajonit të Krushevcit.
Në fokus të hetimit ndodhet kompania “Alfafarm SHPK Shkup”, e regjistruar në vitin 2023, me veprimtari kultivimin dhe përpunimin e bimëve, bimëve aromatike dhe mjekësore për përdorim farmaceutik. Sipas të dhënave nga Regjistri Qendror, kompania ka kapital aksionar prej rreth 529 mijë eurosh dhe disa bashkëpronarë. Vlen të theksohet se janë regjistruar ndryshime në strukturën pronësore vetëm disa ditë para se të zbuloheshin pesë tonët e kontrabanduara në Serbi.
Nga institucionet maqedonase, për momentin, nuk janë dhënë detaje shtesë, me arsyetimin se aksioni është ende në zhvillim. Në rrethin e ish-kompleksit OHIS, ku juridikisht është e regjistruar selia e “Alfafarm SHPK Shkup”, sonte është vërejtur prani e shtuar policore, si dhe prezencë e hetuesve të Prokurorisë dhe personelit mjekësor.
Në Serbi, sipas informacioneve zyrtare, të dyshuar janë pesë persona, prej të cilëve dy janë ende të paarritshëm për organet e ndjekjes penale, dhe po ndiqen për prodhim të paautorizuar dhe vënie në qarkullim të narkotikëve. Numri i të dyshuarve dhe veprat penale për të cilat ekzistojnë dyshime në Maqedoni do të bëhen publike pas përfundimit të procedurës së plotë hetimore, kur pritet edhe konfirmimi zyrtar për sekuestrimin e mbi 27 tonëve marihuanë./skopje1.mk
