Ministri i Shëndetësisë, Azir Aliu, promovoi modulin e ri për evidencë elektronike të ndërhyrjeve kirurgjikale elektive në institucionet publike shëndetësore, përmes të cilit në një portal publik është e disponueshme lista e ndërhyrjeve kirurgjikale elektive të planifikuara.
“Për herë të parë vendosim rregull dhe një protokoll të qartë që evidenca elektronike e ndërhyrjeve të planifikuara të mbahet në mënyrë transparente. Qëllimi është që çdo pacient ta marrë shërbimin sipas parimit “i pari që vjen, i pari shërbehet”. Si është gjendja aktuale në sistemin shëndetësor?! Evidenca për ndërhyrje kirurgjikale mbahet në sistemin “Termini im” përmes lëshimit të një rekomandimi me tip “rekomandim spitalor për operacion”, i cili lëshohet nga mjeku specialist apo kirurg me numër unik të udhëzimit dhe me të gjitha të dhënat e nevojshme për llojin e operacionit nga lista e ndërhyrjeve kirurgjikale.”, – deklaroi ministri i Shëndetësisë, Azir Aliu.
Sipas ministrit Aziri, portali mundëson kërkim dhe paraqitje të të dhënave përmes disa parametrave të kombinuara në portal për dobinë e qytetarëve, po ashtu edhe për krijuesit e politikave në shëndetësi.
“Rezultatet e bëra për analizë për vitin 2025 tregojnë qartë një dallim të konsiderueshëm ndërmjet numrit të udhëzimeve të realizuara, i cili është 58 mijë e 648 të dhëna që janë marrë nga sistemi “Termini im” dhe numri i operacioneve të realizuara, që është 93 mijë e 510 të dhëna që janë marrë nga vet institucioni me kërkesën tonë, gjë që tregon mosrespektimin e detyrimit.”, – theksoi ministri i Shëndetësisë, Azir Aliu.
Ministri Azir Aliu shtoi se me këtë risi po rrisin transparencën, matjet reale të kohës së pritjes, planifikimin dhe shpërndarjen më të mirë të burimeve, si dhe zbatimin e praktikave evropiane në këtë fushë.
