Ministria e Shëndetësisë publikoi emrat e ekspertëve që përbëjnë komisionin e huaj për hetimin e ndërhyrjeve kardiologjike dhe kardio-kirurgjikale. Komisioni përbëhet nga tre specialistë me përvojë ndërkombëtare të njohur në fushën e kardiologjisë dhe kirurgjisë kardiake. Ata kanë punuar si profesorë dhe studiues në universitete dhe qendra mjekësore të njohura në Evropë dhe SHBA, transmeton Portalb.mk.
Komisioni pritet të sigurojë hetim të pavarur dhe profesional për ndërhyrjet e panevojshme të kryera në vend.
“Komisioni i huaj për hetimin e ndërhyrjeve kardiologjike dhe kardio-kirurgjikale përbëhet nga tre ekspertë të shquar të fushës, ndër të cilët:
Dr. Ugolino Livi, kirurg kardiak nga Italia, me përvojë si profesor i rregullt i kirurgjisë kardiake në Universitetin e Udines. Ka qenë i angazhuar gjithashtu si profesor vizitor në universitetet Stenford dhe San Diego në Shtetet e Bashkuara të Amerikës. Ka përvojë të pasur profesionale në fushën e transplantimit të zemrës.
Po ashtu, ky ekspert është anëtar i bordeve redaktuese të disa revistave profesionale evropiane në këtë fushë. Dr. Nikolla Lakiq, kirurg kardiovaskular nga Sllovenia, me përvojë shumëvjeçare pune në pozita drejtuese në Qendrën Mjekësore Universitare të Lubjanës. Ai është gjithashtu doktor i shkencave në Universitetin e Mariborit. Ka publikuar një numër të konsiderueshëm punimesh shkencore dhe profesionale në fushën e kirurgjisë kardiovaskulare. Dr. Çerçek Miha, kardiolog intervenues nga Sllovenia, me përvojë shumëvjeçare në Departamentin e Kardiologjisë (Njësia e Trajtimit Koronar) në Qendrën Mjekësore Universitare të Lubjanës. Ky ekspert ka fituar gjithashtu titullin doktor i shkencave biomedicinale në Universitetin e Lubjanës. Për më tepër, në kuadër të ekspertizës së tij ka qenë i angazhuar si studiues në qendrën prestigjioze mjekësore Cedars-Sinai në Los Anxhelos, SHBA”, njoftojnë nga Ministria e Shëndetësisë.
Në pyetjen nëse ka ndryshime në përbërjen e Komisionit vendor ekzistues, nga Ministria e Shëndetësisë për MIA theksojnë se ndryshimi në përbërjen e Komisionit ka vetëm në pjesën e njërit prej përfaqësuesve të tyre. Si anëtar i ri i Komisionit, siç thuhet, është emëruar dr. Aleksandar Stankov, drejtor i Institutit të Mjekësisë Ligjore, ndërsa kryetar vazhdon të jetë dr. Zharko Hristovski, specialist i kardiologjisë nga Acibadem Sistina, si anëtari më i moshuar i Komisionit.
Sipas burimeve të MIA-s, është e paqartë edhe pse është angazhuar mjek nga Mjekësia Ligjore, pasi kjo ka shkaktuar revoltë te një pjesë e madhe e atyre 16 ekspertëve për sëmundjet kardiovaskulare.
Më 14 nëntor, ministri i Shëndetësisë Azir Aliu njoftoi se komisioni i brendshëm për ndërhyrje kardiologjike dhe kardiokirurgjikale në Ministrinë e Shëndetësisë, nga 19 raportet e analizuara nga pacientët dhe institucionet për raste të dyshuara të ndërhyrjeve të panevojshme në zemër në institucionet publike dhe private të kujdesit shëndetësor, përcaktoi se 10 ishin operacione të kryera pa nevojë ose të referuara pa nevojë për operacione.
Kirurgu kardiolog Sashko Kedev në një intervistë për Kanal 77, tha se në disa spitale private kryhen ndërhyrje të panevojshme për fitim, duke përfshirë stentime dhe operacione të panevojshme. Ai nuk përmendi asnjë spital me emër.
Pas kësaj Ministria e Shëndetësisë formoi Komisionin e Brendshëm të përbërë nga ekspertë mjekësorë, juristë dhe ekonomistë.
në Kosovë
