Në paraqitjen e sotme në Ditarin e MTV-së, ministri i Punëve të Brendshme, Pançe Toshkovski, theksoi se sistemi “Qyteti i Sigurt” nuk ka për qëllim që t’i dëmtojë financiarisht qytetarët, por të shpëtojë jetë njerëzish më shumë.
“Në periudhën e kaluar pati shumë vërejtje, sepse në fazën fillestare nuk kishte tolerancë në kuadër të paralajmërimeve të qytetarëve. Ne vendosëm tolerancë, e cila vlente sipas legjislacionit në fuqi – 6 km/h kur drejtoni automjet deri në 100 km/h, ndërsa mbi 100 km/h toleranca ishte 8 km/h. Rregullorja që është në kompetencë të Ministrisë së Energjetikës, në konsultim me ekspertë, profesorë, me njerëz nga Ministria e Energjetikës dhe nga Ministria e Punëve të Brendshme, u ndryshua dhe hyri në fuqi gjatë ditës së djeshme. Tani, për shpejtësi deri në 50 km/h mbetet siç ishte më parë, tolerancë prej 6 km/h. Kjo do të thotë se nëse drejtoni mjet motorik aty ku kufizimi është 30 km/h, me 36 km/h kamera nuk do t’ju evidentojë për kundërvajtje, por do t’ju evidentojë prej 37 km/h.” Për shpejtësi nga 50 deri në 100 km/h, toleranca ligjore sipas rregullores së re është 9 km/h. Kjo do të thotë se nëse drejtoni automjet aty ku lejohet deri në 50 km/h, me 51 km/h kamera do t’ju evidentojë dhe sistemi do t’ju dërgojë njoftim, përkatësisht do t’ju sanksionojë nëse drejtoni me 60 km/h. Aty ku kufizimi është 100 km/h, nëse automjeti drejtohet mbi 101 km/h, kamera do t’ju identifikojë me tolerancë prej 12 km/h. Pra, do të sanksionoheni nëse kufizimi është 100 km/h dhe ju, për shembull, drejtoni me 113 km/h.” Këto toleranca janë të përcaktuara në kuadër të rregullores nën Ministrinë e Energjetikës dhe konsiderojmë se janë absolutisht të pranueshme, me qëllim që ky sistem të vihet në funksion dhe të shpëtojmë jetë njerëzore më shumë, duke i siguruar qytetarët se qëllimi ynë nuk është ndëshkimi, por të ketë më pak të lënduar, më pak aksidente trafiku dhe më pak humbje jetësh”, ishte i thuktë ministri Toshkovski.
Në këtë kontekst, ministri paralajmëroi edhe një projekt tjetër që do të zbatohet në ditët në vijim me mbështetjen e Telekomit të Maqedonisë.
“Për të gjitha këto shkelje që bëhen në kuadër të tolerancës – pra nëse ndalohet mbi 30 km/h, prej 30–36 km/h, nëse ndalohet mbi 50 km/h, prej 50–59 km/h – do të dërgojmë mesazh informues nga Ministria e Punëve të Brendshme për çdo qytetar që e ka tejkaluar shpejtësinë. Me këtë do t’ua tërheqim vëmendjen qytetarëve se, edhe pse vozisin brenda tolerancës ligjore dhe nuk do të ketë dënim financiar, gjegjësisht nuk do të ketë kundërvajtje, ata e tejkalojnë shpejtësinë e përcaktuar me ligj, me çka, mos e dhëntë Zoti, cilido qytetar që drejton automjetin me 55 km/h aty ku është e lejuar të drejtohet automjeti maksimum me 50 km/h dhe në këtë rast lëndon ndonjë këmbësor me lëndime të rënda trupore, do të përgjigjet penalisht”, përfundoi ministri i Punëve të Brendshme, Pançe Toshkovski.
