Komisioni parlamentar i punës sociale, demografisë dhe të rinjve i dha dritën jeshile propozim ndryshimeve ligjore, më të cilat vihet në funksion të plotë regjistri i posaçëm i personave të dënuar për krime seksuale ndaj fëmijëve dhe pedofilëve. Teksti harmonizohet me ndryshimet në Kodin Penal, ndërsa pas miratimit të plotë nuk ka më pengesa ligjore për funksionimin real të regjistrit.
“Bëjmë harmonizim me ndryshimet në Kodin Penal, gjegjësisht me atë që më herët ishte ‘persona të mitur’, tani trajtohen si’ fëmijë’. Regjistri që për fat të keq edhe nuk ka funksionuar, me hyrjen në fuqi të këtyre propozim ndryshime të këtij ligji do të rregullohet tërësisht”, tha Gjoko Vellkov, Zv ministër i punës sociale.
Deputetja e koalicionit VLEN, Imërlije Saliu tha se fakti që ky ligj ka mbetur nëpër labirintet e Kuvendit, ka shpëtuar dhjetëra pedofilë e abuzues fëmijësh.
“Përcakton qartë veprën penale ndaj fëmijëve, përcakton institucionet dhe procedurat për dorëzimin e të dhënave në regjistër. Pastaj siguron që regjistri të përmbajë të dhëna të plota dhe të përditësuara për të gjithë kryerësit e dënuar. Këto janë ndryshimet të cilat i parasheh ligji”, tha Imërlije Saliu, deputete e VLEN.
Në komision u pranua edhe amendamenti i një grupi deputetësh, të cilët kërkuan që një herë në vit të kontrollohen dhe përditësohen të dhënat në sistem si dhe ato të harmonizohen me të dhënat e institucioneve të tjera, siç janë ajo e drejtësisë dhe ministrisë së brendshme.
Regjistri i posaçëm i personave të dënuar për krime seksuale ndaj fëmijëve është një databazë që përmban informacione për personat që janë dënuar me vendim të formës së prerë për abuzim seksual të fëmijëve, përfshirë pedofilinë. / Alsat.mk
