Xhihan Ahmed, e cila ishte kandidate për anëtare e Komisionit për Mbrojtje nga Diskriminimi, dha dorëheqje, shkruan gazeta KOHA.
Në seancën dëgjimore, edhe pse është magjistre e së drejtës ndërkombëtare, Ahmed nuk arriti të demonstrojë njohuri elementare për Konventën e Stambollit, e cila është dokument kyç për mbrojtjen e grave nga dhuna.
Në pyetjen për bazat juridike të Konventës, ajo u përgjigj me një përshkrim historik të qytetit të Stambollit dhe periudhës së Ataturkut, në vend që të shpjegonte mekanizmat për mbrojtje nga diskriminimi që i parashikon konventa.
Sipas ligjit, anëtar i Komisionit kundër Diskriminimit duhet të ketë të paktën shtatë vjet përvojë pune në fushën e të drejtave të njeriut, prej të cilave të paktën pesë vjet në sferat e barazisë dhe mosdiskriminimit.
Rishikimi i CV-së publike të Ahmed tregon se ajo nuk ka përvojë pune në këtë fushë. Përvoja e saj e deritanishme profesionale është në kompani private, si asistente universitare dhe profesoreshë në shkollë të mesme, me theks në sigurinë korporative, çka nuk e kualifikon për funksion në Komision.
Madje, ajo sot gjatë ditës e kishte falënderuar kryetarin e LD-së, Izet Mexhiti për mbështetjen si anëtare në këtë Komision të rëndësishëm shtetëror. (koha.mk)
