Sistemi “Safe City” që do të hyjë në fuqi nga 1 shkurti, do të njohë katër lloje të shkeljeve në trafik dhe atë:
Parkim i pa rregullt
Kalim në semafor të kuq
Ngasje e veturës me regjistrim të skaduar
Ngasje e makinës me shpejtësi më të lartë se e lejuara
Për secilën prej shkeljeve, ligji parasheh gjoba të caktuara dhe atë:
Për parkim apo ndalim në vend të ndaluar
30 euro për kundërvajtje standarde
45 euro nëse automjeti pengon qarkullimin
50 euro nëse është parkuar në vend të rezervuar për persona me aftësi të veçanta
Për kalim në semafor të kuq gjoba është paraparë të jetë 250 euro por nëse me atë shkelje shkakton edhe aksident në trafik, atëherë do të ketë dhe përgjegjësi penale.
Kundërvajtja e tretë është për drejtim të automjetit me leje të qarkullimit të skaduar, për të cilën gjobat janë si në vijim:
100 euro gjobë për shoferin
250 euro gjobë për pronarin e automjetit, nëse është person tjetër
Kundërvajtja e tretë ka të bëjë me tejkalim shpejtësie dhe gjobat variojnë sikurse:
deri në 20 km/h mbi të lejuarën: 20 euro
nga 20 deri në 30 km/h: 45 euro
nga 30 deri në 50 km/h: 300 euro dhe ndalim i drejtimit të automjetit nga 3 deri në 12 muaj
mbi 50 km/h : 400 euro dhe ndalim i drejtimit të automjetit për së paku 12 muaj
E kur jemi te shpejtësia e lëvizjes së makinave, kamerat e “Safe City” do të kenë dhe tolerancë.
Në vendbanime ku shpejtësia maksimale e lejuar është nga 50 deri në 100 km/h, toleranca është vendosur në 6km/h. Pra, nëse shpejtësia maksimale e lejuar është 50km/h, atëherë gjobat do të fillojnë të shqiptohen duke filluar nga 57km/h. Në vendet ku shpejtësia maksimale është nga 100 deri në 200 km/h, toleranca do të jetë 8 km/h. Pra nëse në autostradë shpejtësia maksimale e lejuar është 120km/h, gjobat do të fillojnë të shqiptohen vetëm nga 129 e më tepër.
Siç njoftoi dje ministri i brendshëm Pançe Toshkovski, përpos kamerave që janë të vendosura në vende të caktuara, brenda dy muajsh në territorin e tërë shtetit në funksion do të vihen edhe vetura speciale me kamera mobile të cilat do të fotografojnë shkeljet brenda kornizës së “Safe City”. /Alsat.mk
