Drejtori i Drejtorisë për Udhëheqjen e Librave Amë, Faton Fazliu, ka bërë të ditur se pas 24 vitesh pa identitet ligjor, një nënë ka marrë më në fund njohjen institucionale që i takon, ndërsa fëmija i saj është regjistruar menjëherë në Librat Amë dhe është pajisur me certifikatë lindjeje dhe numër amë.
Në një postim në Facebook, Fazliu thekson se ky rast është realizuar falë bashkëpunimit ndërinstitucional ndërmjet Misionit të OSBE-së, Ministrisë së Shëndetësisë, MPB-së, Ministrisë së Transformimit Digjital dhe Drejtorisë për Udhëheqjen e Librave Amë, e cila ka realizuar regjistrimin civil dhe procedurat përkatëse.
Sipas tij, bëhet fjalë për një shembull konkret të reformave në regjistrimin civil, të cilat kanë ndikim të drejtpërdrejtë në jetën e qytetarëve. “Identiteti ligjor është çelësi për qasje në shëndetësi, arsim dhe pjesëmarrje të plotë në shoqëri”, ka shkruar Fazliu.
Ai ka theksuar se institucionet kanë përgjegjësi të përbashkët për të parandaluar pashtetësinë që në lindje dhe për të siguruar që çdo fëmijë ta nisë jetën me dinjitet dhe të drejta të garantuara. “Ky angazhim vazhdon”, ka përfunduar Fazliu.
