Presidenti i SHBA-së, Donald Trump, deklaroi për New York Post se një armë e re sekrete, të cilën ai e quan “Shkatërruesi” (“The Disruptor”), ishte vendimtare për operacionin amerikan që çoi në arrestimin e presidentit të Venezuelës, Nicolás Maduro.
Sipas Trump, kjo armë “bllokoi funksionimin e armëve të armikut” gjatë operacionit më 3 janar, kur helikopterët amerikanë hynë në Karakas për të arrestuar Maduron dhe gruan e tij, Cilia Flores.
“Shkatërruesi. Nuk më lejohet të flas për të,” tha Trump në një intervistë nga Zyra Ovale, duke shtuar se nuk dëshironte të jepte më shumë detaje, por konfirmoi përdorimin e armës në operacion.
Ai tha se forcat që mbronin Maduron nuk arritën të përdornin raketat e tyre, edhe pse, sipas tij, ato ishin sisteme armësh me origjinë ruse dhe kineze.
Dëshmitë nga Venezuela
Edhe pse detajet për “Shkatërruesin” nuk janë të shumta, dëshmitë nga Venezuela tregojnë se rojet e armatosur që mbronin Maduron ranë në tokë.
Atyre u doli gjak nga hunda dhe patën shqetësime të mëdha.
Një anëtar i ekipit të sigurisë së Maduron raportoi se “papritmas të gjitha sistemet e radarëve u fikën pa asnjë shpjegim”.
Menjëherë mbërritën helikopterët dhe rreth 20 ushtarë amerikanë.
I njëjti dëshmitar përshkroi se në një moment u aktivizua diçka që dukej si “valë shumë e fortë zanore”, duke shkaktuar dhimbje të forta, gjakderdhje dhe paaftësi për lëvizje tek të pranishmit, të cilët sipas tij nuk mund të qëndronin më as në këmbë pas efektit të saj.
Maduro, 63 vjeç, mbahet tani në një burg federal në Brooklyn, duke pritur gjykimin për akuza që lidhen me drogë dhe terrorizëm. Ndërkohë, detyrat e presidentit të përkohshëm të Venezuelës i ushtron ish-zëvendës presidentja e tij, Delcy Rodríguez.
