Arianit Xhaferi
Të premten në Maqedoninë e Veriut u votua si ligj sistemi SAFE CITY, i cili përmes kamerave në qytete monitoron shpejtësinë e automjeteve dhe në bazë të saj vendos gjoba.
Duhet ta themi qartë: përparësia kryesore e këtij sistemi është rritja e sigurisë në komunikacion. Në një vend ku për shkak të shoferëve të pakujdesshëm janë goditur dhjetëra këmbësorë dhe shumë prej tyre kanë humbur jetën në vend ose si pasojë e lëndimeve, çdo mekanizëm që ul shpejtësinë dhe disiplinon trafikun është i mirëseardhur.
Nga ana tjetër, reagimet nuk mungojnë:
– Pse SAFE CITY po aplikohet (fillimisht) vetëm në Kumanovë, Shkup dhe Tetovë?
– Pse jo në të gjithë Maqedoninë e Veriut?
Reagimet shpesh shkojnë në drejtim etnik, me pretendimin se sistemi është vendosur në qytete me shumicë shqiptare, duke “harruar” faktin që Gostivari, Dibra, Kërçova dhe Struga (po ashtu me shumicë shqiptare) NUK janë përfshirë.
Ndërkohë, qytete më të mëdha me shumicë maqedonase si Velesi, Manastiri, Strumica, Prilepi dhe Ohri nuk janë përfshirë – dhe DUHET të përfshihen.
Qytete më të vogla si Berova, Pehçeva, Vallandova, Demir Hisari, Dellçeva, Dojrani, etj., ku kufizimi është 40–50 km/h dhe zakonisht vozitet edhe më ngadalë, realisht nuk paraqesin prioritet krahasuar me bulevardet urbane, rrugët rajonale dhe autostradat.
Pastaj vjen dimensioni politik. Opozita akuzon pushtetin, pushteti e mbron vendimin; ndërkohë që të gjithë e dimë se po të ishin rolet e ndërruara, edhe qëndrimet do të ishin të ndërruara.
Kështu që… fuck off politika në këtë temë.
Qëndrimi im personal, si bashkëpronar i një biznesi të sigurisë dhe shëndetit në punë:
SAFE CITY është një mjet i dobishëm për ngritjen e sigurisë rrugore dhe për uljen e numrit të aksidenteve, veçanërisht atyre me pasoja fatale. Ky sistem duhet të shtrihet në të gjithë vendin, sidomos në autostrada, në rrugë rajonale, në bulevarde urbane, ku rreziku është real dhe i përditshëm.
Nëse dikush mendon se SAFE CITY është vendosur vetëm për të “mjelur” paratë e qytetarëve – zgjidhja është shumë e thjeshtë:
Respekto rregullat dhe kufizimet e shpejtësisë
Dhe në vend të pareve… jepi shtetit gishtin e mesëm pa paguar asnjë denar 😉 😀
Siguria nuk është ndëshkim. Siguria është përgjegjësi.
