Kryetari i Kuvendit të Maqedonisë së Veriut, Afrim Gashi, ka vlerësuar si produktive ditën e punës në Kuvend, gjatë së cilës u përmbyllën disa seanca plenare dhe u morën vendime të rëndësishme me interes të drejtpërdrejtë për qytetarët.
Sipas Gashit, me konsensus të gjerë parlamentar u zgjodh Avokati i ri i Popullit, Faton Selami, i cili do të marrë përgjegjësinë për garantimin dhe mbrojtjen e të drejtave dhe lirive themelore të qytetarëve.
“Zgjedhja e Avokatit të Popullit me mbështetje të gjerë është një sinjal pozitiv për funksionimin demokratik të institucioneve dhe përkushtimin ndaj mbrojtjes së të drejtave të njeriut”, ka theksuar Gashi.
Postimi i plotë i Gashit:
Një ditë produktive në Kuvend, ku u pëmbyllën disa seanca plenare. Me konsensus të gjërë u zgjodh Avokati i Popullit, me ç’rast Faton Selami merr këtë përgjegjësi për garantimin e mbrojtjes së të drejtave dhe lirive të qytetarëve.
Ndër të tjerat, u miratuan disa akte të rëndësishme për qytetarët:
-Propozim-ligj për ndryshimin dhe plotësimin e Ligjit për kundërvajtjet (i ashtuquajturi Ligji për Qytetin e Sigurtë)
-Propozim-ligj për ndryshimin dhe plotësimin e Ligjit për punë të brendshme
-Propozim-ligj për ndryshimin dhe plotësimin e Ligjit për polici
Propozim-ligj për ndryshimin dhe plotësimin e Ligjit për Regjistrin e veçantë për persona të dënuar me aktvendim të plotfuqishëm për vepra penale të keqpërdorimit seksual të personave të mitur dhe pedofili
Këto vendime përbëjnë një hap të rëndësishëm drejt forcimit të sistemit ligjor, rritjes së sigurisë publike dhe mbrojtjes së të drejtave të qytetarëve.
